孖妹S檔案：人仔狂Chok點「算」好？

靠支付寶賺息幫補

陳：內地資產管理公司分析員 陳鈺斌

Kitty：幾年前你由香港返內地讀大學，估唔到你讀完書會留喺內地發展，依家仲做埋中資資產管理公司嘅分析員添，人仔貶值，你交家用以港元埋單，咁咪好蝕本？

陳：我估人民幣貶值多一年就會見底，我依家每個月出糧就會存入去支付寶入面嘅餘額寶，佢上年開始受香港人玩，我會當做人民幣活期存款，近期年息逾3厘，所以都可以幫補下對抗貶值，直到我要返香港先提款，之後再兌番做港元。

陳：上星期見到找換店同銀行勁墟冚，好多人想兌走人仔，我有內地朋友會透過支付寶買港股基金，希望彌補到貶值，朋友亦會直接買港股，專揀藍籌股、國企成分股、一啲收入主要係港元或美元嘅公司，同埋華夏旗下交易所買賣基金（ETF）；個人就留意緊之前一度跌得較深嘅大藍籌，好似騰訊控股（00700）、中國移動（00941），仲有香港證券股等，吼緊機會補補貨。

內地基金吼港藍籌

彩兒：其實內地嘅投資公司有冇伺機「北水南調」呢？

陳：近年內地投資公司睇到人民幣匯價跌，都會考慮投資以其他貨幣結算嘅投資產品，例如港股，我間公司規模有百幾億元人民幣，本身主力投資房地產項目同小量A股，早兩個月開始用幾千萬元人民幣去試水溫，主力投資香港藍籌股，我留意到公司對穩健、現金流充裕嘅公司較有興趣，例如金蝶國際（00268）、香港交易所（00388）及騰訊等，長揸為主。

陳：事實上，近半年，內地有好多投資公司都會長期請港股分析師，聘請要求好有趣，好多時係需要有2至5年喺香港居住嘅經驗，我公司嘅私募基金部門都請咗20至30位熟悉港股嘅同事，皆因內地投資經理係好難了解港股機制，剩係供股、合股嘅做法都已經搞到佢哋一頭煙。

深圳私募愛賭殼股

Kitty：我知你有好多做私募基金嘅朋友，咁實收到好多風啦？

陳：嗯，少少啦……喺內地炒A股主要係炒內幕，啲基金管理人喺股份炒起之前6至9個月已鋪排好炒邊隻股份，其中尤其係深圳私募基金賭性特別強，呢類基金炒港股時偏好殼股，吼佢注入資產，等佢煲起；另外，佢哋特別關注十幾億至廿幾億港元市值嘅香港上市內地民企，皆因呢類公司喺港股市場收貨較A股市場容易。

港股展現價值投資

康：內地散戶 阿康

彩兒：你大學時期已睇到人民幣下跌趨勢，開始用幾萬蚊喺港股市場試水，果然有遠見。

康：我一四年頭開始炒港股，之前就炒開A股嘅，當時又覺得港股市場嘅金融體制同監管完善過A股市場，風險較低，加上香港市場全球化，內地通脹勁，所以想將資金轉去港股市場抗通脹。

投資額佔整體五成

康：內地投資者愛盲目跟消息短炒，自己就較信奉價值投資，覺得港股市場比較啱自己，一四年同一五年，我嘅港股組合回報分別都有約8%，一六年就同大市同步，冇乜變動，現時組合主要係藍籌股，好似內銀四大行同中國移動，港股投資額佔整體投資四至五成。

Kitty：後生遙遙玩藍籌，少有少有……

康：我大學嗰陣係讀IT，有選修金融、財務嗰方面嘅科目，建立咗理財概念；畢業後，我喺國企入面做營運部，冇咁多時間睇市、亦冇精力不斷做分析，而且身處內地，其實有好多香港嘅財經資訊網站係睇唔到，我嘅港股資訊主要都係來自內地網站，所以咪長揸藍籌居多。

康：港股同A股最大分別係受外圍股市同國際大事嘅影響大啲，好似之前美國加息同美國大選咁，內地就會傾向跟政策紅利短線操作，所以好唔同；香港冇漲跌停板機制，反而操作更靈活，未來我對香港嘅高增長股最有興趣，中資股都會較令我有安全感。

抽新股前睇清形勢

廖：內地散戶 廖先生

彩兒：內地大媽走資無極限，雖然你唔係大媽，但你都算早着先機，一早識投資港股同歐股基金，人仔跌咗你分分鐘都冇咁傷。

廖：雖然人民幣匯價有反彈過，但近期身邊仍見到大把人想將人民幣兌換做美元，換完就放喺床下底，又或者放喺銀行做外幣存款保值，只有少數人識衝出內地市場，走去買港股。

廖：其實我今年都好想嚟香港買保險，不過依家冇計啦，中央嚴防走資，限制匯錢，匯少少錢可能就畀人查到飛起，連螞蟻搬家咁匯都唔得，完全係堵截人仔外流啦……現時對港股都有興趣，但係要睇定啲先。

Kitty：你不嬲投資都手起刀落，要睇定啲？唔似你喎！

廖：我依家只係得幾萬蚊港股貨底咋，包括特步國際（01368）同八字頭股份（創業板股份），依家留意緊啲新股，前排好多細隻嘅新股升幅好勁揪！特別係招股價1蚊樓下嗰啲，真係細細隻易炒起，嗱，就好似今個月頭上市嗰隻順興集團控股（01637）首日掛牌升咗七成。

廖：不過就算抽新股都好，我都唔會大手玩，皆因前年領咗嘢。我第一隻抽嘅股係盛力達科技（01289），招股價7.72元，我12元沽，賺咗幾萬蚊，就係因為有甜頭，之後就隻隻新股都抽，後來撞正大時代後股災，隻隻都曾經潛水三至四成，有啲就潛水五成，搞到我蝕住沽，所以依家唔會心急，要睇清楚股份走勢同規律先出手。

彩兒：交完學費喇，希望你今年苦盡甘來。

看好聯想觸底回升

廖：我不斷睇緊書學投資，之前睇《金融怪傑》（Market Wizards），意會到內地限制資金外流，係會令人民幣趨向貶值，覺得人仔會跌穿七算。

廖：我好鍾意睇沈大師（沈振盈）同埋郭Sir（郭思治）嘅股評，不過都唔會齋聽貼士嘅，要自己做番分析，所以努力學習中，因為近期工作忙咗好多，冇咁多時間睇實個市，未來會傾向集中買港股大藍籌同埋恒生H股ETF（02828），慳番管理時間，特別係隻聯想集團（00992），我覺得佢業績基數低，不利因素舊年已經反映晒，即將觸底回升，另外有好多股份早前回調唔少，但我唔會亂撈底，邊估到底吖！

Kitty、彩兒