Market Insight：中資券商股有得諗

貿易戰難分輸贏

事實上，美國擺明要針對中國打貿易戰，中國亦唔會坐喺度等你打！上周就傳來中國正針對貿易戰籌劃政策儲備。事實上，蘋果公司、Tesla等美企都積極開拓內地市場，若然美國真係動手制裁中國貨，中國還擊必從在華美企落手，到時美國佬係咪搵自己笨，就要放長雙眼等着瞧！

見個市交投好番啲啲，同股友出嚟茶敍都多番啲話題。上周就有兩位資深股友打牙骹戰，一個就話原來全世界有兩個大誤會，就係認為中國經濟好掂，美國同俄羅斯經濟都好差，事實係美國經濟正穩步復甦，俄羅斯擁豐富天然資源，經濟自給自足直頭係世外高人，反而中國經濟發展過度透支，依家半生不死，唔知點收科；另一個中國通就話，其實話中國爆煲論根本就係老外陰謀，中國市場未完全開放，環球性金融風險難以完全導入中國市場，何來爆煲之誘因！

到底邊個啱，在下費事火上加油，但其實在下心諗，美國經濟唔係差但都唔係想像中咁好，而中國經濟係唔好但又唔係大家想像中咁危！

相對而言，美國行關門主義，並不利外來投資，反而中國堅持改革開放及地區合作，機會將會較多，呢一點，相信未來全球資金流將會作出公平裁決！

中信證券可睇中長線

再睇A股市場，上周五收市後傳來中證監或於月內鬆綁股指期貨，呢個消息對A股嚟講應該係好消息，皆因自一五年A股大時代大冧市以來，股指期貨基本上係停頓咗，機構投資者無法做對沖，根本無得玩，所以A股交投一直低迷。

穩步推進屬正常

據消息所講，中證監鬆綁都唔會一步到位，而係先將非套期保值客戶的單個產品單日開倉交易限制由十手改為廿手，有秩序正常化，都唔係壞事，以防又重演「一放就癲，一收就死」的局面。中長期看，年內A股市場融資功能逐步復常，對兩地市場發展有利。

基於呢個趨勢，中長線中資券商股亦值得考慮。在去年上半年的內地券商排名榜中，以營業收入計，中信證券（06030）排名與一五年相同，都係第一，排名第二及第三分別為國泰君安（01788）及廣發証券（01776）。若然A股交投有起色，作為行業之首的中信證券亦自然是最受惠的一群。

中信證券H股現價16.1元，與大時代高位40.5元仍有好一段距離，過去三季主要波幅區則介乎15至18元區域，排除今年A股會出現比大時代更糟糕的情況，在15至16元水平，中長線有得諗。

騰訊反彈或有玄機

上周重磅股騰訊控股（00700）股價成功重上190元關，上周五高位見過196.8元，收報195.1元，升0.9%。不過，見到上周五上海及深圳港股通在QQ的交易淨額均現負數，咁呢轉炒上到底係咩人買？

若然真係班外資開始買番啲貨，從重磅的QQ入手亦唔出奇，不妨繼續觀察資金流情況，或對首季魚缸表現有所啟示。

此外，上周見到瑞聲科技（02018）同舜宇光學（02382）股價都有反彈，隨着「侵侵」上場，中美貿易關係可能轉趨緊張，一旦美國對中國貨品實施重關稅，中國必以其人之道還治其人之身，美企在華業務必受影響，主力做蘋果公司手機零件加工的製造股，會唔會好景不再？故在反彈浪追貨宜注意風險。

古勝