人仔黑天鵝，挾淡挾到傻！對唔住咁多位，雖然我知道「黑天鵝」呢三個字已經於一六年畀人用到爛，爛到裂開，而押韻同食字呢家嘢又係老土到不能容忍嘅地步，不過都無計，唔咁樣講，宣洩唔到我心入面對人民幣挾淡挾到癲嘅嗰種興奮心情！
實在係太刺激，太出人意表喇！人民幣於全世界冚扮爛睇破七的情形下，一個屈尾十來個絕地大翻身。於隔夜（四日）彈逾800個點子上到最高6.88之後（我講緊離岸呀吓），於即市（五日）再挾多800！高位呀，就連6.80都穿埋呀！
至於個市，滬綜指、滬深300唔升唔跌、死吓死吓已經唔係重點（阿爺有性格已經係常識）最難得的是港股佢有反應喇終於！恒指於昨日收市大漲322點，成交上到646億元！20大成交額榜上的股份，我搵唔到一隻係跌嘅！
到了呢個普世歡騰的時刻，未有貨的你必然會問：吓！唔係話人民幣兌港紙一算不是夢，兌美元破七gogogo嘅咩？算吧啦，你話我今日的我打倒昨日的我都係咁話架喇！從來挾淡、冚倉都係砰砰聲上喇，加上前排市場對人民幣貶值的預期咁一面倒，大把人無鞋挽屐走啦今次！
雖然咁挾法明顯係overshoot（彈過咗龍）多少喇，但你唔好理，今朝有酒就今朝醉，今朝有股就今朝追！（唔好意思，我又玩食字喇，大家從文字裏頭都已睇得出我成個人high晒！）
總之，恒指收復了20日同50日線，向上望就是先前我有提過的黃金比率阻力22,927點，該處會是今浪的第一個目標。哇，粉絲們仲有現金喺手的話唔使捐窿捐嚹，恰埋眼買番幾隻大路藍籌，好似騰訊控股（00700）同友邦保險（01299）已經好足夠。
富昌金融研究部總監 譚朗蔚（作者為註冊持牌人士，本人及客戶持有騰訊、友邦）