Market Insight：金礦股小注炒番轉

人仔速彈見工夫

呢一着，出現喺中國外匯儲備快要失守3萬億美元大關前，又適逢在春節前市場流動性趨緊期間，唔難令人聯想到可能係人行行動。此外，在下周「侵侵」召開上任前記者會，此前人仔極速反彈，美匯指數創兩個月以來最大跌幅，唔通要挫吓「侵侵」銳氣？反正如果真係有心而為之，選時確實有下工夫！之不過，匯市交易商就話未有發現人行入市干預的手影，咁到底係咩一回事？

從匯市角度看，早前資金一面倒看好美元，借人仔沽空的需求大增，但資金池根本不足以支持沽空需求，加上人仔貶速未足以抵銷息升影響，空軍無利可圖，前日人仔反彈，觸發炒家選擇平倉離場，空頭回補的動力就成為呢兩日離岸人民幣急彈的主要原因。

洗完一次太平地，相信短期匯市新聞唔會再日日講人仔就快破7。

金價下跌空間有限

「侵侵」當選後，大打基建牌以刺激經濟，且加息終成事，令資金回流美國。

聯儲局預測今年加幾多次息，都將「特朗普因素」納入考慮。隔晚公布的十二月份會議紀錄，亦指出幾乎所有官員認為特朗普政策可促使經濟加快增長，而大部分官員認為加息步伐將加快。傳統定律係美元升金價跌，的確，舊年十一月初金價跌勢加劇，上月中旬更低見1,122.5美元。

金價跌咗咁多開始有人入貨，加上多項不確定因素，金價反彈至四周高位。多隻金礦股連日借勢做好，招金礦業（01818）、紫金礦業（02899）、靈寶黃金（03330）以及中國黃金（02099）昨日的升幅介乎2至4.3%。

未來影響金價的因素眾多，加息步伐加快，應不利金價，但仍要睇加息三次是否兌現；其次係地緣政治因素，仲有「侵侵」上台、英國脫歐、歐洲多國選舉等。不明朗因素一個接一個，雖然造成市場恐慌的機會唔高，但憂慮難免，加上中美通脹預期升溫，相信金價大升未必得，但下跌空間有限，可考慮小注跟進紫金及招金。

恒指發圍追重磅股

受人仔匯率波動影響，港股亦乘機打破悶局，恒指昨日在能源股帶動下，重上22,400點樓上，高位見22,483點，收報22,456點，升322點，主板成交增至646億元。睇番昨日經滬、深港股通南下資金合計唔夠10億元人仔，可見真係有錢落場買吓貨，希望係個好開始。

藍籌股中，「三桶油」股價升幅介乎1.6至4.1%，騰訊控股（00700）收升2%，最差係兩隻食品股蒙牛乳業（02319）及中國旺旺（00151）。雖然現時判斷人仔貶值告一段落言之尚早，相信急彈過後匯率會回復平靜。惟個市唔會無了期呆滯，唔係大升就係大跌呢句話講咗好似冇講，但事實如是。既然開咗邊，食住個勢，想追重磅股，可留意三桶油及騰訊。

睇恒指走勢圖，由去年九月高位延伸的降軌阻力在22,700至22,800點水平，若能以大成交突破，有機會再試23,000至23,200點阻力區。

古勝