香港搞邊科：搞電子餐牌年收逾千萬

為客戶提供資訊科技解決方案的主網（亞洲），客戶有EPSON、OLYMPUS、康泰旅行社、商場K11及愉景新城等。公司近年做多了食肆自動化項目，如板長、牛角的電子餐牌、必勝客的網上訂餐系統和排隊機等。

廚房顯示系統提高效率

「我哋喺市場上嘅收費處中低水平，一路都係捱住做，到近幾年公司專注餐飲自動化系統先好啲。」Ben指：「我們唔係要幫餐廳炒人，而係幫佢哋慳人手以維持原先服務質素。現時可畀客戶用平板電腦點餐嘅餐廳，每10間有7、8間都是我哋嘅客戶，當中以日式餐廳佔比最多。」

他續稱，電子餐牌以外，該公司提供的餐飲自動化方案，還包括廚房顯示系統，可智能地把多位顧客的相同落單集合，簡化廚房溝通和提高出菜效率；Android作業系統操作的排隊機；以至顧客可通知侍應加水、結帳的智能手錶。「雖然近期香港零售市道轉差，但餐飲業似不太受影響，很多餐飲集團續開新舖。」他觀察指。

從小喜歡科技、電子及機械的Ben，志願是當工程師，順理成章在大學時修讀工程，並由那時開始接觸電腦。畢業後打工一年多後，他貿貿然與朋友在九七年首次創業：「當時每人夾幾萬元開公司，做一些網絡相關嘅嘢，但實在太早創業，路好難行，要勒住褲頭過日子，月入唔到1萬元。後期接到工作，賺到少許資金，就成立主網（亞洲），營運至今。」

Ben憶述：「○○年原想食住科網熱潮發圍，點知食唔到，幸而公司冇死到，於是繼續為客戶製作大型功能性網站（如產品比較平台）。到最難忘嘅○三年沙士期間，我哋同很多潛在酒店客戶見面，一搵佢哋就得閒，但冇一間傾得成生意。○八年金融海嘯時，我哋反而多咗項目做，或同當時大公司炒咗好多科技人手有關。因此我哋經歷咗三次經濟危機都生存到，都係咬緊牙關過，仲有咩秘訣真係唔知。」

寄語太早創業未必好事

惟他忠告，大家不宜太早創業：「呢個唔係年紀問題，而係創業家喺唔同方面準備好未，不論人脈、經驗同資金。若你認為創業，便冇老闆管束、通宵工作覺得辛苦，咁你要再諗清楚是否適合創業。」

政府鼓勵年輕人創業，而不是鼓勵就業，Ben對此十分反感：「愈來愈多機構透過資金、培育等方式支持創業，我同樣唔贊成。一來，初創公司存活率唔高大家都知，若客戶光顧咗你，但你好快結業，咁對客戶公平嗎？二來，若所有人創業，社會點發展？邊個去打工？」