二○一七年絲絲首次見大家，先來破舊立新，齊戒以下11壞習慣，提升工作效率，早日出人頭地。
1）【為瞓多幾分鐘，撳停響鬧】：瞓多幾分鐘，唔會令你精神咗。你真正需要嘅，係深度睡眠。
2）【將手機放床邊】：手機、電腦等發出嘅藍光，會抑制褪黑激素分泌，影響入睡。褪黑激素水平低易抑鬱。
3）【強迫性上網】：乜都上網影響工作效率，放工先問fb大神吧。
4）【唔食早餐】：中大早兩個月就發表咗項大型研究，發現每日食早餐嘅學生，測驗成績平均高30至50分，相等於比同年嘅接受多1.5年教育！
5）【重要工作拖至最後】：人普遍傾向易嘅做先，難嘅推至最後一刻，但又意志力有限，結果愈重要嘅愈完成唔到。
6）【經常Check Msg】：每次Check會令你失去25分鐘工作時間，而且經常Check令人遲鈍添。
7）【畀理由自己放縱】：例如慳咗一星期後，決定假期畀自己一日大吃大喝，呢種叫「Moral licensing」，會打亂原本養成嘅良好習慣。
8）【立下太多目標】：「股神」巴菲特教話列出一生想做嘅25件事，然後只做最想做嗰5件，其餘20件事忘記佢。
9）【成日坐】：要行多啲企多啲先好，流動嘅空氣令人思考更清晰，有更多Idea。
10）【一心多用】：只有約2%人能夠真正Multitasking，其餘98%人只會專注力下降。
11）【開太多會】：開會容易打斷工作，緊要嘢先開會傾吧。
余絲韻