絲絲講場：美國理財專家：後生唔買樓超錯！
「唔買樓超錯！」何止香港，連美國著名理財專家David Bach都咁提醒當地啲年輕人！佢仲話現今美國千禧代（「千禧代」者，即是80後打後、00年前出世嗰批，嗱，咪以為係00後）唔優先考慮買樓，就係犯下最大錯誤。
點解佢講到咁激？事關同香港唔同，當地有唔少聲音話買樓自住係「美國人嘅噩夢」，反對做「樓奴」，仲甚至話樓唔係資產而係負債添！（仲記唔記得呢個咁經典嘅講法，出自邊位？咪就係《窮爸爸‧富爸爸》位作者清崎囉！）
不過Bach就認為，後生買樓等於「搭咗上架致富升降機」。佢仲警告，如果唔靠買樓，啲千禧代喺呢個國家唔使旨意有機會有錢，甚至會一啲揸拿都冇添。
財富較租樓多38倍
佢仲計到條數話，有磚頭揸手嘅人，平均財富較租樓人士多38倍！「除非你擁有某啲不動產，否則你冇份玩積累財富呢個遊戲。」
呢位理財專家出過書《The Automatic Millionaire》，佢喺本書度講過，「如果你租樓住，眨眼就用咗你50萬美元甚至更多（每月房租1,500美元，30年就是54萬美元），但結果最終你一無所有。但如果你買樓，將同樣嘅錢嚟畀按揭，最終你會有個自己嘅家！」
揸一層物業夠退休
佢冇得個講字，佢自己本身亦係白手興家，佢認自己成世人至醒投資，就係買過三個物業，「我最初喺三藩市買樓，結果當地樓價爆升；搬到紐約後再買一層樓，樓價同樣飛升。我嘅淨資產就係咁幾百萬、幾百萬（當然講緊美元啦）咁上，就只係因為我要有層樓嚟住。」佢仲話，人始終要喺某個地方度過餘生，既然係咁，點解唔投資一個屬於自己嘅家！佢仲話，置業者到咗50至60歲時，層樓嘅價值已夠你退休。
講到樓，睇怕香港後生仔比美國嗰啲早熟得多！
余絲韻