人民幣匯價跌跌不休，我不知道大家有無同我一樣的心理準備呢？我近日經常於腦海裏幻想，唔使幾耐我就可以好似大爺咁拎住一大疊港紙返上內地使，係會畀人當番神咁拜喇！我講話係「當番」，即係唔係未試過囉！想當年我先得幾歲，返到內地的港紙直情係香嘅，係過去這十年八年先畀人當成地底泥啫嘛！
於目前的市場上，睇淡人民幣前景的不只我一個。有人睇同港紙兌一算，有人就睇同美金兌七。我成日都話，美匯的強勢收唔到科，人民幣的跌勢就一日都係跌，有兩個方法可以解決的：第一，就是人為去調整匯價；第二，就是將人民幣掛鈎其他貨幣囉！前者中央於上年倒轉嚟做，後者中央好似已經做緊，不過都唔係治本。
隔晚外電有條news feed話「在岸人民幣兌美元突破7整數位關口，最低觸及7.0121」，嚇到好多人鼻哥窿無肉，外媒爭相轉載，搞到人行都急不及待要出來闢謠。
人行透過官方的微博話：「十二月二十八日，境內銀行間外匯市場人民幣兌美元交易匯率在6.95至6.9666元區間平穩運行。但卻有個別不負責任的媒體報道『在岸人民幣兌美元突破7整數位心理關口』，對此行為我們表示譴責，並保留進一步追究責任的權利。」
以上的說話我係一字不漏咁搬字過紙，費事唔夠傳神，大家feel唔feel到中央有幾肉緊！雖然於我的心目中「7」這個位不是今日穿都隨時會於短期內穿啦，咁煞有介事做乜啫？但是，我起碼可以從中央花咁大啖氣睇到，大家今次真係觸動到阿爺的神經喇，佢哋原來堅係重視「7」呢個大位！假如我由此而推算出「7」會係調控政策的觸發點，會唔會係太武斷？
富昌金融研究部總監 譚朗蔚（作者為註冊持牌人士）