Market Insight：少做少錯來年再戰

反而，值得一提的，係隻騰訊控股（00700），連續兩日做好，昨日更加一度飆到上189.4元，收報187.6元，升2.18%，成交達41.4億元，佔大市成交額7.8%。

騰訊料反彈未完

話呢隻股係基金粉飾窗櫥效應下被大盤推上，說法較具可信性，畢竟唔少大型港股或亞洲股票基金都揸住騰訊，年尾做番好啲可以幫忙美化吓份成績表，若然新年假後交投持續活躍，有機會順道炒一轉上196元左右，先至回頭再試180元支持。

魚缸搵食實在艱難

由於唔少人仲放緊假，港股成交都係單字一個「靜」，好在騰訊發力，恒指先跌後回升，收報21,790點，升36點。今日係除夕前交易日，相信大市繼續淡靜，重磅股個別走，考慮到外圍及匯市等因素，都係無謂揸倉過假期，等下周再作部署。

回顧今年魚缸表現，散戶定基金大戶一樣咁難搵食，一來指數波幅細，二來交投萎縮，總之一潭死水。唔少投行高層為咗保住薪金水平，寧願辭職唔撈，都唔接受大幅減薪，出嚟搵埋三五知己夾錢開住檔嘢玩吓先，希望等到新一浪來臨再復出。

散戶們諗住揸多些少高息股或人仔定存會安全啲，點知臨第四季先中晒伏，即使想短炒密食當三番拉上補下，都冇咩好炒，惟有少做少錯，唔做唔錯！股市交投愈來愈靜，唔係冇原因。

管理層應變受考驗

正由於魚缸難搵食，旁門左道特別多。好似新股圍好晒飛，上市後股價一味放紙鳶，放到咁上下就掉頭炒落派通街，真係屢見不鮮；再如沽空機構，出唱淡報告前大手沽空個股，到出報告後收割獲利，同明刀明槍「打劫」分別不大，而且仲十居其九成功。

間中遇着實力內地莊家，股價唱唔淡仲要被挾番轉頭，平倉輸錢走，唔係冇但就真係絕無僅有。

古勝茶餘飯後就聽卜架講，有上市公司用某大會計師行核數，臨差唔多埋尾，就收到核數師電話，話收到匿名信話公司某些帳目有問題，要加收費用核過部分帳目。

對於無厘頭指控，上市公司老闆一頭煙，條氣唔多順，結果拖住會計師樓，再喺內部成立一Team人專門核查有關帳目，確認冇問題，最終冇加錢核數唔在講，仲把幾火換埋個核數師！

八卦料有冇加鹽加醋唔清楚，但上市公司遇上無厘頭指控，確實係幾考管理層危機應變，能夠處變不驚主動出擊化險為夷的，間公司管理水平直頭可以為估值加分。

古勝