要回到未來，邊使出對自動綁帶波鞋咁複雜，出張通告就得！今次主角唔係《回到未來》嘅Marty，而係中國康大食品（00834）。
康大食品尋日朝早八點幾發通告話「股份將於十二月二十八日下午五時五分起」短暫停牌。經絲絲精密分析後，發通告之時係二十九日，二十八日已經過咗，點會係「將」？仲有，「下午五時五分」？全人類都收晒市喇喎，點仲「短暫停止買賣」？
好彩佢哋尋日下晝一點幾發澄清通告，查實係「十二月二十九日上午九時開始」短暫停牌。絲絲見佢哋總算從時間空隙爬番出嚟，至於由發通告至澄清呢5個鐘發生咩事就冇人知喇，不過應該都夠來回一次過去未來嘅。
余絲韻