絲絲講場：大媽理財信晒機械人

香港投資基金公會就大家有幾Like「機械人理財顧問」（Robo-advisor），訪問咗950名投資者，當中香港投資者佔70%，內地投資者佔30%。調查結果發現，內地投資者對機械人理財顧問認知度及熱衷度，都高過香港投資者。

更估佢唔到嘅係，內地至Like機械人理財顧問嘅唔係後生嗰啲，而係五十幾歲以上嗰啲！

52歲或以上嘅內地投資者，有興趣幫襯「機械人理財」服務嘅佔88%，香港同年紀嘅只得30%有興趣！咁叫做後生些少嗰啲又點？30至34歲嗰批，內地74%話有興趣幫襯機械人，香港只得45%！

港投資者要同人交流

點解香港投資者冇咁「信」機械人？公會認為因為內地投資者用網上平台交易較為普遍，香港投資者就較為重視同客戶經理或投資顧問嘅交流與互動。

公會行政總裁王慈明仲話，相比其他亞洲國家好似印度、菲律賓咁，香港傳統金融配套成熟及完善啲，令香港投資者較為依賴理財顧問，並唔係話對機械人理財冇信心，「印度及菲律賓投資者反而會跳一步，比較多使用網上或者手機交易。」

機械人理財即係點，你都想試？王慈明話，目前業界包括券商與銀行亦研究緊，佢仲話會係大勢所趨添。第時仲有咩嘢唔係機械人？絲絲覺得既High又心寒。

余絲韻