Market Insight：手機設備股揀嚟買

樓市降溫或拖後腿

最近內地官方企圖為明年經濟增長維持在6.5%水平作好市場預期管理，可惜A股唔多領情，滬綜指於3,300點受阻後，輾轉回到3,100點邊打滾。查實，以首三季中國GDP交出6.7%增長來說，6.5%的目標唔算好難，不過今年內地樓市好似飲咗咖啡溝興奮劑一樣，癲足十個月，隨着第四季嚴防泡沫蔓延，各地辣招重臨，明年樓市熱度降溫，拖經濟增長後腿的威力有多大，實在不容忽視。

同時，特朗普入主白宮，貿易口水戰隨時開打，人民幣兌美元跌跌不休，做中國經濟或者A股大好友都需要相當大的勇氣，中字派只能在估值極度壓抑下，才偶意炒吓死貓彈。

金風科技必有後福

深港通開車兩星期，唔知係咪地理上屬比鄰關係，深圳股民對港股較為熟悉，雖然阿爺嚴防走資，向券商暗示通車初期唔需要大鑼大鼓，過去兩星期深港通南向唔算熱爆，但卻一副細水長流，每日持續有三幾億元人仔淨流入的情況，可見深股估值貴到爆之下，確實有好多神心的散戶，陰啲陰啲日日落嚟買。

對佢哋揀股偏好，實在值得鑽研，撇除唔識睇像豐盛控股（00607）呢類股份，可再生能源及新能源車似乎都啱佢哋胃口，上周睇見隻金風科技（02208）淨買入都幾活躍，火電上網電價將再被下調，但消息是預期之內，股價面對壞消息不跌反升，似乎是大難不死必有後福，上周五股價又再逼近13.1元重要阻力，破位在即短期要睇。

丘鈦科技吼位短炒

舜宇光學（02382）、瑞聲科技（02018）及信利國際（00732）股價由年初到八月高位，翻咗一番。後兩者股價見頂後，就掉頭浸浸落。而舜宇早前遭大行睇淡其前景，股價由42元水平回落，股價已跌穿近幾個月支持35.5元，後市唔排除會下試30元。

內置機件有要求

通達集團（00698）股價月初開始下滑，後來因大行睇淡，令跌勢加劇，目前有喘穩迹象。集團客戶主要係內地品牌，即使銷售中端手機，但質素愈來愈高，好多都用金屬外殼，連雙鏡頭都有，的確吸引到一群消費者。小米、華為、Oppo等冒起，通達同丘鈦科技（01478）均可受惠。

丘鈦今年業績有好轉，上半年收入按年增長98.8%，純利增長三成。該股於八月先起動，至今上升一倍，現時仍處高位整固，短線可在3.9至4.5元間炒上落，睇下後市能否突破4.5元阻力，失守3.5元止蝕。

古勝