美股連升多日，港股照例唔跟，昨日朝早開低26點後，大市無明顯方向，全日主要在22,300點水平附近泥漿摔角，全日僅166點波幅上落，臨近尾市U盤嘜高，恒指倒升13點報22,446點，主板成交縮至643億元。
聯儲局加息幾成定局，但市場觀望氣氛濃厚，期望可以探知來年再加幅度。昨期指交投亦比前日縮近兩成五，僅8.4萬張，日市以22,458點收市，期指即市炒家都係睇多過做。
以收市計，恒指未重返十二月五日收市價22,505點之上，雖然尾市拗腰倒升，惟未能太早斷定後市脫離危險及本月雙頂不破的威脅。進入十二月中旬，大市開始趨向淡靜，即市更為難測，賭大錢的基金大戶陸續離場，如果看官們不是有特定心水股份，應減低倉底細細注，輸贏一笑置之，是一六年餘下時間明哲保身的選擇。
手上的勒束式短倉，22,800點認購及22,200點認沽，時間溢價加快消耗，套裝期權金落到約250至260點子，後市無乜心水，一於坐住個盤等收息。
John Mullen