一六年差不多走到尾聲了，回顧過去的一年，環球財資市場上真是好戲連場，這套戲又可以叫做《觸目驚心》，又可以叫做《天鵝湖》，總之就是嚇到你死，chok到你暈！
香港時間周四凌晨，全球市場就要迎接（如無意外是）最後一幕的煞科：聯儲局加息喇！總結一下目前市場上最主流的預測先：就是加息25個基點（唔使審的）會後聲明會透露一七年加息兩次（正路係咁）。
不過，今年套戲有名你叫《天鵝湖》即是周圍都是黑天鵝，又有無咁容易畀你估到呢？
不過，股、匯、債市有理無理，都一併將加息的預期入價了！美股進入了無人之境，日升夜升。
我們圍內的朋友已經開了一個盤口，估道指幾時會高過恒指了！我買了下年第二季喇，趁未有太多人信的時候買，賠率高幾倍嘛！
美匯指數企穩100樓上，我們行家在隔晚飯局的時候才說，人民幣破七？幾個月內啦，無懸念啦呢個。
至於十年期的美債孳息上到2.71厘，相對債價就跌到一仆一碌。無計，資金大挪移呀依家，萬佛朝宗，返晒去美利堅。
到了這個時候，我估好多人都想問：個趨勢幾時停？我睇未有咁快，不過，中間一定會有喘息的機會，即是吊頸都要抖下氣嗰種呢。美匯指數話強唔強，在過去的半個月以來都衝唔上101.75喇。
假如耶倫的說話唔夠新意，美匯試穿100，個日圓咪彈囉，所以準備在聖誕節去日本的粉絲們，見字後可以去排隊喇。至於股市，我唔預有太值博行情，始終A股暫時轉差，美股再上但港股都無點跟，恒指22,927點cap到年底吧！
富昌金融研究部總監 譚朗蔚（作者為註冊持牌人士）