絲絲講場：芬佬遭AI搶食無得撈？

話說主講嘉賓之一嘅工銀瑞信資產管理（國際）總經理唐華話，業界大趨勢係多元資產策略、人工智能（AI）同大數據，佢預言基金經理十年後減人工，廿年後飯碗不保。佢又話自己都驚驚，仲同班手足講「你哋可能係幸運嘅末代基金經理」！嘩嘩嘩，全場都做基金，講呢啲？Touch Wood！

大數據發展成趨勢

唐總嘅言論自然成為大家中場休息嘅話題，絲絲不禁懷疑，乜電腦可以比人類了解人咩？更擅於分析市場脈搏咩？點知，連東驥基金管理董事總經理龐寶林都坦言驚遲早無得撈，話市場都估唔到特朗普做美國總統啦。依家香港金融業被科技取代嘅情況望起上嚟無咁嚴重，只係香港落後咋！以依家AI同大數據發展迅速，資產管理呢行日後只有掌握背後科技，同埋識得湊客！

完場嗰陣，絲絲又去問吓身為「主人家」嘅香港投資基金公會主席柏智偉（Arthur Bacci）有無擔心。Bacci話有邊行易做吖，佢哋信安美國嗰邊最近都試緊用機械人嚟寫報告，但就派定心丸話有才華嘅唔使驚喎。

亦有與會者分析，被動型投資（即係交易所買賣基金『ETF基金』嗰類）吸資愈嚟愈多，搞到基金今年好難捱，日後行業會更加「M」形兩極分化，大公司轉身成本低唔使驚，細嘅就要靠科技同投資主題有吸引力啦。大家Touch Wood。

余絲韻