絲絲講場：招行海外托管中心首間落地香港

尋日招商銀行（03968）香港分行個辦公室傳來一陣燒豬味，有咩喜事呢？原來係招行首間海外全球托管中心搞開幕，仲請到招行行長田惠宇飛嚟香港剪綵兼切燒豬！連主持人都話，田行長真係尤其重視托管業務，一提托管，佢幾忙、幾遠都出席，仲叫埋五位行長級高管一齊出席，真係夠晒畀面。

田行長話，海外托管中心雖然係低調開幕，但佢哋嘅托管業務絕對唔低調，招行至第三季尾托管資產已經達到9.4萬億元人民幣，排名全國第二，緊追工商銀行（01398）。佢話，銀行托管係典型輕資本業務，而且可以配合客戶海外配置資產需求，所以係招行嘅「重中之重」。

余絲韻