絲絲講場：銀行大班個仔唔煉金轉投「魔」界
Banker個仔唔「煉金」，走咗去做魔術師！話說友邦香港聖誕傳媒午宴每年都有小驚喜，今年就請咗魔術師嚟表演近景魔術（即是近距離畀你睇住嗰種）。呢位魔術師官仔骨骨，非常之咁型仔，個名叫Lawrence Sullivan，咦！咪即係星展香港前大班蘇禮文（Randolph Sullivan）個仔！
蘇禮文助星展打江山
Lawrence嘅爸爸蘇禮文於銀行界享負盛名，曾任前道亨銀行首席營運總裁兼董事。隨着○一年星展收購了道亨，蘇禮文亦隨合併加入星展，並且推動道亨、DBS廣安同海外信託合併成為今時今日嘅星展香港。○三年完成呢項「合併工程」後，蘇禮文成為星展香港嘅首任行政總裁，直到○六年九月先至榮休。
Lawrence友邦午宴露兩手
點解Lawrence有煉金術師唔做，去做魔術師？雖然爸爸係銀行家，但讀國際研究、喺香港生活咗30年嘅Lawrence話，從來冇涉足過銀行界，反而11、12歲開始對魔術有興趣，透過睇書同向其他魔術師學習後，投身魔術界。
經過多年磨練，Lawrence嘅魔術表演已相當純熟，尋日都有輕露幾手近距離魔術。Lawrence話，依家佢已成為全職魔術師，平日多數接企業Show表演魔術，仲成立咗一間公司專營魔術道具添。話時話，幾時返佢阿爸舊舖星展香港去露兩手呢呵！
余絲韻