孖妹S檔案：財演花紅鬥豪鬥賺
又到年尾，一眾上班族最期待嘅畫面終於出現，無錯！正是出雙糧或派花紅嘅高峰期！孖妹以往都會對此非常期盼，事關有錢就會想飛去南韓搵Oppa（韓文：哥哥），不過，今年就好想收起任性，的起心肝儲錢，買番幾手股票好過……我哋搵到金融界五大財演食飯，八卦吓佢哋收幾多花紅，點用呢筆錢先最精明！
黃：金利豐證券研究部執行董事 黃德几（Dickie）
Keep住增長 夠買BMW
Kitty：「金融界黎明」點會係浪得虛名，出完花紅會唔會即刻裝身？
黃：我公司個財政年度係出年三月先埋數，花紅呢啲高度秘密好難講你知喎，哈哈！我只可以話，自我入公司以嚟，花紅係有多冇少嘅，Keep住有增長，我相信今年度花紅會有增長嘅……啱啱過去嗰年嘅花紅都可以買到歐洲車嘅，寶馬都得，嗱！我冇講乜型號啊，希望今年花紅夠買架好啲型號嘅寶馬啦！
想趁通車買H股ETF
黃：我實在太多興趣，又鍾意使錢，無論衫、酒同模型車等都鍾意買，收到花紅最好即刻儲起佢，以往都會做啲保守型投資，例如指數基金同大價股，現時我對H股ETF較有信心，因應有滬港通同深港通之下，H股相對A股折讓有望收窄。
彩兒：我哋留意到金融界年尾有唔少公司炒人，行內朋友係咪人心惶惶？
黃：金融界派唔派花紅其實好視乎個老細，華資行一般較有人情味，我以前都有做過外資行，佢哋嘅花紅好視乎市況，每年差距好大，可以好波動，部門與部門之間嘅差別亦都可以好大，特別係後勤部門，好似研究部就慘啲，工作成果難量化。
黃：今年整體行業氣氛同上年比不復從前，睇番上市券商業績，比起舊年高峰期成交可以話爭咁截，有做保證金融資嘅話，生意就比較平穩，所以今年係有挑戰嘅一年。雖過往取態積極嘅券商都炒人，但應該係個別事件，唔係通行都係咁，隨住人民幣國際化，加上人民幣貶值，內地資金或會通過港股通渠道炒港股，即使深港通唔會出現狂開戶情況，但都算有危有機。
李：大中華投資策略研究學會副會長（港股） 李偉傑（Jason）
佣金勝去年照積穀
彩兒：今年個市冇舊年咁爆，搵少好多？
李：我嘅收入主要用佣金嚟計，而唔係用花紅去衡量，其實今年佣金相比起舊年大時代有十幾個百分比增長，金額係中高嘅五位數字，都算係咁啦！上年個市暢旺好多，主因有大時代托起半邊o拉但成交其實已沉寂多時，舊年可以話係上半年火爆，下半年慘淡；今年市道就相對平穩，三、四月市況先開始好轉，做我哋呢行，賺到佣金都要積穀防饑o架，同埋主要用喺生活同小朋友身上。
先行部署等A股「入摩」
Kitty：聽聞你今年細屋搬大屋，投資有冇改動？
李：我囝囝升咗小學，自然要多啲活動空間，所以由以往實用面積三百幾呎單位，轉咗去同區五百八十幾呎單位。我哋會Keep住每年去兩、三次旅行，嚟緊聖誕節會同家人去台灣宜蘭玩，會失蹤番幾日。
李：近排個市真係靜，我食緊花生，個人長線持倉年尾都已經減磅，因為好擔心美國一旦公布加息，會出現大跌市，現時主要揸住中資股，同埋A股ETF（交易所買賣基金），部署定等A股「入摩」，亦會短炒半新股。
林：國農證券董事總經理 林家亨（Simon）
炒半新股自製花紅
彩兒：你九月先加入依家間公司，今年咪冇花紅？
林：以往嘅花紅只係得一個半月糧，即係十幾萬元，不如靠自己炒股賺錢好過，今年十一、十二月我就炒半新股自製花紅，其中隻膳源控股（01632），喺佢上市之後，我就不斷炒波幅，雖然佢上星期尾回落咗，令我賺少咗，都仲有幾十萬賺，最高峰帳面賺過百萬！你唔好話畀人知我賺咁多，老婆要抽稅，我一笑佢就知我賺錢，所以返到屋企都只係敢偷偷地匿埋喺廁所笑咋，哈哈！
持盈保泰 只玩即日
林：為咗炒半新股，我都推晒啲Live節目喇，現實啲，睇實個市賺錢好過啦，好似上星期隻進昇集團控股（01581），我喺暗盤0.7元掃咗四十幾萬蚊貨，第二日一開市0.8元即沽，賺咗約6萬蚊，如果做節目，點捕捉呢啲機會啫？如果等首掛臨收市先沽就死啦，要倒蝕。
Kitty：咁炒半新股自製花紅，仲有乜必殺技？
林：今個星期美國有絕大機會會加息，到時大市會較波動，所以要力求持盈保泰，盡量唔好過夜，只玩即日鮮，近期我會投放約400萬至500萬元炒半新股；因應美國即將加息，深港通因素已全面反映，我已將大價股持倉減磅，更加會避開地產股同房地產投資信託基金（REITs），但顧及特朗普上場後有蜜月期，相信仲有得玩，冇全面清倉。
溫：新鴻基金融集團財富管理策略師 溫傑（Kenny）
料夠歐遊 炒股有賺
彩兒：你成日話想買樓，花紅夠唔夠畀首期？
溫：今年個市係冇咁好啦，一月先會調整人工，但花紅要等到出年四月先會有，希望呢幾個月個市會好啲啦，喺逆境中扭轉形勢，花紅數目呢啲嘢就唔講得啦，比較敏感，但講真，其實份工做得開心，有前景更加重要，錢呢啲嘢都係其次，夠去歐遊啦，不過歐遊都有分經濟同商務艙嘅，同埋平時我自己都有儲開錢，之前亦有入咗隻膳源控股（01632），賺咗少少，賺幅約17%，當送畀自己嘅小禮物啦。
擬買荃灣新盤自住
嚟緊都想快啲儲到錢可以買到樓，今年初樓價低嘅時候又冇買到，希望下年可以成功買到樓啦，目標係新界西區，對荃灣西嗰啲新盤都幾有興趣，但都係會自住，投資就真係會揀番自己玩開嘅股票。
蘇：招銀國際策略師 蘇沛豐（Daniel）
儲錢投資教育基金
Kitty：Daniel，作為新手爸爸，睇嚟你啲花紅都要充公，交晒畀老婆做教育基金喇……
蘇：今年市況冇上年咁旺，對花紅都冇咩期望，一早已經有晒心理準備花紅可能會少過上年，但都有機會同上年保持同一個水平嘅，但數字就唔好講啦，夠買一年嘅奶粉嘅，但買車方面就唔使啦，我不嬲都冇車，所以都唔使諗換部七人車，就算出咗花紅都會打算儲起佢，自己不嬲都有儲錢，可以做吓教育基金。
大市過埋年料好轉
仲有，近排深港通開通，市場反應亦唔係話咁熱鬧，你睇吓成交金額就知啦，依家市場都係觀望狀態多啦，起碼要過埋農曆新年先會好啲，希望出年個市會好番啲啦。
money.biz@on.cc
彩兒 Kitty