再炒歐洲放水，A股又復勇，兩飛中齊，但恒指居然都無得升，炒港股真的愈來愈頹，加上接近聖誕假期，成交很可能轉走下坡，不妨休養生息，索性避戰。
港股走勢失望，最明顯的藉口當然是美元升勢，對於外資而言，這段時間應該追住美股及日股，甚至歐股來買，一定好過在港股逆水行舟。何況最近先後個多月期間，投資港股藍籌股的經驗相當差。
先後有友邦保險（01299）、香港地產股以及澳門股，在一個政策消息或者傳聞之後，一夜之間急跌，然後騰訊控股（00700）及中國移動（00941）就輾轉向下，彈極都唔起，剩低滙豐控股（00005）支撐大局。輸錢兵家常事，可是死在突然而來估佢唔到的消息，以及唔知點解不明不白這兩種狀況，同樣會令士氣大受打擊。
雖然十二月一度狂炒半新股，但普羅大眾睇市一定是睇指數。恒指不振，炒細股就不會說成雞犬皆升，而是群魔亂舞，很難提得起興趣去炒。何況今次炒風連作個故事都懶，純炒供求，更加不成氣候。至於特首不求連任，以近期港股氣氛，絕對不易炒得起。
逆向思維的話，頹到最盡反而會是商機，長期保持樂觀理應有着數，不過總不可能是無限能源入市，買到夠，保持住一個合適的持股量便算。
最近自己曾經兩度冒險加倉博突破，事後回看時機啱，只不過力度遠遠弱過預期，可是即使全身而退，精神上卻大幅損耗，一定要隔一段時間才夠膽再博，所以既然不似快有突破，就倒不如靠邊站。
豐盛金融資產管理董事 黃國英（作者為註冊持牌人士，基金持有友邦及騰訊，以及中移衍生工具）