近日滙豐控股（00005）可謂一洗頹風，日日升1至2%，交足功課。完全應驗了我於過去一路以來強調：只要股價突破62蚊，消化晒去年尾季於60至62蚊之間的蟹貨的話，上望70、80蚊真係唔出奇，最緊要夠膽追！
大摩上調滙控的評級由「減持」連跳兩級到「增持」，主要是看好：一、受惠加息憧憬；二、放貸業務加速；三、資本比率改善；四、派息高夠吸引。計我話齋都是老調重彈，舊聞來。真正炒得起飛象的原因其實得一個，就是憧憬聯儲局於下周加息。
成個故事的脈絡是咁的：Fed fund rate（聯邦基準利率）升，債息升；債息升，國際金融股的fixed income（定息）投資收益又升。如果從呢個脈絡來推斷的話，其實追唔到滙控的粉絲們是可以追下渣打集團（02888）個喎！不過利申先：我有貨。博咩？博渣打學人哋滙控咁，起碼都創番個52周高（68蚊）先啦！
所謂「聖誕鐘，買滙豐」咁有貨的粉絲們係咪要揸到聖誕先？抑或揸到下周四，聯儲局宣布加息時趁好消息出貨呀？我認為短炒出貨是無可厚非，始終幾日升一成的確係爽！不過，就長線而言係值得keep喎。事關目前市場的焦點始終都仲炒緊舊經濟，未有耐去番科技股度。一個唔該下周班聯儲局官員加息兼夾放埋鷹囉喎，真係於下年初見埋80蚊都有知！
富昌金融研究部總監 譚朗蔚（作者為註冊持牌人士，持有渣打）