石油減產的議題搞定，市場好快又要將焦點轉移到意大利於周日舉行的公投！不過於討論之前我要介紹番，今次的公投係唔關脫歐事，係總理倫齊要修改憲法，關乎到日後立法同議會組織的改革呀！唔好開口埋口就淨係識話脫歐、黑天鵝咁先得o架！
等我同大家惡補一下今次公投的起源先！話說於二次大戰之後……（又好似遠得滯？都係唔講咁遠喇）總之，你有無發現歐元區的國家，成日都會出現提前大選，好似立立亂咁？其他國家又唔會。
意大利一直為了防止有獨裁者出現，於是就利用上下議院去制衡政府。不過，意大利的政黨數目又多，搞到權力分散，項項政策都傾唔掂數。上下議院同政府三權長期分立，上下議院仲會不時投票逼政府下台，於是個政府咪年年換屆囉！
在這種制度底下的經濟係唔會有發展的。所以倫齊就一於的起心肝，尋求民意來支持改制。
我諗大家聽完長篇大論，最終都係想要一個答案罷：升？定係跌？直接點說：假如修憲獲得通過的話，意大利的發展可能會好啲，但係關香港咩事？假如唔通過呢？咪同依家無分別囉！
最多，咪就係倫齊會承認失敗然後引咎請辭，之後總統又會留佢。
你信我啦，意大利係點真係唔關你事，你顧掂你自己先啦！
富昌金融研究部總監 譚朗蔚（作者為註冊持牌人士）