Market Insight：工業製造股炒復甦

油價升得不合時宜

特朗普經濟學揚言大搞基建，以政府開支推動美國經濟，結果短短三個多星期，美金、美股及有色金屬全部升爆，唯獨油價受制於油組減產會議的不明朗因素，唔肯跟升。結果油組達成○八年以來首個減產協定，在老大哥沙特妥協下，過程來得順利，隔晚紐約期油勁升9%，逼近50美元一桶的關口。

油價遲來的春天似乎唔多合時，周日意大利憲法公投，本來純粹是議會制度改革的表態，惟總理倫齊表明公投萬一遭否決，會辭職引發國會重選，勢必令意大利疑歐勢力——五星運動得到更大政治籌碼，隨時推意大利走向脫歐最後一步。

特朗普概念炒得一段日子，會唔會炒意大利引發歐盟解體四分五裂，好難講，萬一好嘅唔靈醜嘅靈，在地緣經濟不穩，需求減弱的預期下，油價想升都難。近排歐元弱勢畢呈，歐鎊交叉盤由美大選日的0.9算碌到落尋日0.85都守唔住，匯商舉動似預視劇情正朝着市場唔想見到的方向發展。

餐飲股估值有數得計

近期幾家快餐股公布中期業績，表現不一，其中翠華控股（01314）半年賺4,223萬元，按年減48%；大家樂（00341）中期賺2.3億元，按年升11%；大快活（00052）同期賺1.03億元，按年增長1.8%。若然係經常幫襯開連鎖快餐店的食家，對呢三家快餐股的營運表現唔會感到意外。

毛利率計法有別

再睇兩家酒樓股，稻香控股（00573）中期溢利9,229萬元，按年倒退0.1%。富臨集團（01443）中期賺1,680萬元，跌38.7%。但令古勝感到奇怪的是，富臨業績首頁話公司毛利率有70.3%。今時今日在香港做酒樓，可以有七成毛利率，再睇公司半年收益13.98億元，純利僅1,680萬元，唔通眼花？

細看，富臨中績所指的毛利率達70.3%，計算方法只是將收益減去「已出售存貨成本」，而並未有扣除僱員成本，物業租金等其他銷售開支。若以大家樂、大快活、稻香以收益減去銷售成本來計毛利率的方法一算，富臨的毛利率其實與三間公司的毛利率相差不太遠。

先別論點解同類股會有唔同會計方法，投資者睇公司業績宜動動腦筋，着眼小處，才能掌握到個股價值。

中國龍工慢火煎魚

內地上月製造業PMI數據向好，經濟短期企穩，此時都係睇番內地工業製造相關板塊穩陣。睇見隻濰柴動力（02338），無論人民幣貶值、出口美國及內地經濟復甦等全部當炒概念兼備，尋日破位收13.5元，創52周高位。

從事基建機械生產的中國龍工（03339），雖然無濰柴咁有爆炸力，但近期走勢勝在慢火煎魚，一三年盈利開始見頂，惟到今年中期賺1.99億元人仔，已多過舊年全年，德銀預告龍工第四季環境續有改善，股價破咗四月高位扭轉一浪低於一浪形勢，中期可看好。

古勝