名牌箍客，逐個電話打畀啲VVIP，留定新貨等客落舖試？Out喇。為咗想啲客落多幾轉舖買多啲衫同袋，何止請客睇Fashion騷，仲搞埋生日Party、私人晚宴，連參觀藝術館都包！
講緊係英國名牌Burberry搞個人化服務，有隊「Private Client Associates」專招呼啲高端客，睇個客鍾意咩就幫佢搞咩，務求箍實佢。
點招呼法？好似今年二月，住喺日本嘅39歲電訊業高層Naoko Kawachi，得Burberry安排坐商務位飛倫敦睇時裝騷，連五日豪華酒店住宿。之後佢時不時落Burberry舖行，就算冇幫襯，每次都有杯香檳招待佢。Kawachi話有時入去只為同啲Sales打個招呼，感覺似家人咁話！
Burberry仲參考超過1,000萬名客戶嘅購物紀錄，分析客嘅身形、鍾意咩色咩Style，再度身訂造建議。咪睇小，公司內部數據顯示，獲呢類個人化服務嘅客，再幫襯機會高20%，平均消費會多35%。
據貝恩策略顧問公司估計，未來四年個人奢侈品年銷增長只得2至3%，比之前廿年間嘅平均6%，放慢一大截。名牌一樣搵食艱難！
余絲韻