絲絲講場：5個至靠害嘅事業忠告！

講明先：做人涉及風險，可升亦可跌，閣下不應只單獨基於本文而作出任何重大人生決定。

1、「唔好炒股！」

受害人：股神巴菲特

巴菲特當年未夠21歲，有兩個人叫佢唔好入行炒股，一個係佢阿爸，另一個係佢師傅格雷姆（Benjamin Graham），即係被稱為「價值之父」嘅經濟學家。巴菲特當年讀哥倫比亞商學院，格雷姆就係佢老師。

點解唔好入行炒股？可能覺得巴菲特要成熟啲先好掂股票啩。不過好明顯巴菲特冇聽佢哋講，否則點有今時今日超過5千億港元嘅身家！

2、「你一個人實搞唔掂！」

受害人：美國地產天后Barbara Corcoran

Corcoran當年畀同佢夾份開過公司嘅前男友睇死，個男人話「你冇咗我實唔掂！」多得個男人呢句，Corcoran發憤創辦咗The Corcoran Group成為地產天后。個男人依家點？唔知呢。

3、「已經有人做過啦！」

受害人：暢銷作家Malcolm Gladwell

Gladwell寫嘅書，你未睇過都會聽過，好似《引爆趨勢》（The Tipping Point）、《決斷2秒間》（The Blink）、《異數》（Outliers: The Story of Success）等，本本勁賣。

但原來佢初出道嗰時，每當有諗頭，佢有個朋友總係例牌一盆冷水照頭淋話「有人寫過啦！」不過Gladwell就認為，同一個題材每日夠有一百個人寫過啦，睇你點寫啫。好彩咁，大家先有機會睇到呢一本又一本暢銷書。

4、「搵食最緊要周圍派卡片！」

受害人：理財顧問Ramit Sethi

Sethi話，搵食唔係靠張懶光鮮嘅卡片與名銜，而係靠人脈同能力。

5、「遵從自己嘅熱情而行！」

受害人：NBA達拉斯小牛班主古班

古班話，一味「遵從自己嘅熱情」冇用，重要嘅係「努力」先啱！佢話呢個世界未必搵到既有前途而你又好有熱情嘅事業，齋靠熱情唔可以當飯食，不如搵一瓣自己叻嘅，埋頭努力創一番事業。就係咁，佢依家身家257億港元。

余絲韻