絲絲講場：輪后朱紅戒蟹5年食番夠本
唔少股民都聞「蟹」色變，不如一次過食晒落肚有仇報仇！中銀國際股票衍生產品部董事朱紅（Niki）原來「蟹禁」幾乎五年，佢日前就一共食咗10隻大閘蟹！
充實自己 開始學韓文
「爸爸係上海人，所以我自細就被訓練點食蟹。不過，近五年因為生小朋友同要餵母乳，一直逼自己戒口唔食蟹。終於，細仔依家一歲半唔使再餵母乳，我可以食蟹食番夠本！」Niki話，啲蟹係親戚去上海陽澄湖買返嚟，所以好放心同家人一齊食。
依家有一仔一女嘅Niki，近期多咗中、港兩邊走，為內地同事與投資者解答輪證疑難。佢仲不忘學新嘢，十一月開始學韓文，因佢好熱愛南韓文化，「自己愛聽韓語歌、睇韓劇都十幾年，就諗學埋韓文，所以依家見到啲韓文就會唔覺意諗吓點發音。」
余絲韻