絲絲講場：滙豐獅子為乜搞到七彩？

放心，原來兩隻經典銅獅阿「Stephen」同「Stitt」仲繼續坐喺電車路嗰邊個入口，位置完全無變，遊客依然可以先影完皇后像廣場，再順手影埋兩隻石獅。

至於五顏六色呢兩隻，原來係Stephen同Stitt嘅複製藝術品，分別叫「自豪之獅」同「團結之獅」，只會限定展出一個月，真係要影就快手啦！

「彩Stephen」嘅條狀花紋代表彩虹旗，「彩Stitt」嘅圓圈代表團結，出自本地藝術家林煒燊創作。

帶出尊重LGBT訊息

呢對七彩獅子，係滙豐帶出要尊重不同性傾向及跨性別人士（Lesbian, Gay, Bisexual and Transgender，簡稱為LGBT）嘅訊息，所以靈感來自代表LGBT嘅彩虹顏色。

數數吓，滙豐總行都有成半打獅子坐鎮。Stephen同Stitt守一邊，七彩嗰對連同兩個花崗岩獅頭就守另一邊。唔知佢哋夜晚夜闌人靜嗰陣會唔會玩出禍呢……傳聞嘅嘢，自己上網打「滙豐獅子」搵啦。

余絲韻