本來，我打算同個仔報名參加一個聖誕節舉行的親子慈善跑。不過，到報名前一刻我先發現，個活動只招待四歲以上小朋友，我個仔唔夠秤，唔使旨意有得參加。主辦方好好人呀，佢問我：「你個仔幾時唔夠四歲先？我哋接受報名時唔夠？還是比賽當日夠四歲？」我好感激他的一番好意，無奈是，我兩樣都唔夠！
於現實生活中，符唔符合條件，有無得入閘其實係好講timing（口架）！上星期五，深港通開通的日子終於都落實喇！不過，大市於本周初的反應有點令人失望，其中港交所（00388）同券商股表現疲弱，北水南下有淨流出，連AH差價折讓最闊的浙江世寶（01057）周二都急瀉17%。餘下依然獲得市場資金追捧的，就只有一眾南向港股通新貴，即市值超過50億的恒生綜合小型股指數的成分股。
我用三百字來同大家遊咗咁大個花園，當中只是想突出「timing」這一個關鍵。市值夠50億，到底係講幾時？你有無聽過？當局有無講過？係宣布開通嗰刻？係通車嗰刻？抑或係其他先？
就市場於周一的反應而言，中國機械工程（01829）配合大成交炒高了6%，但公司市值有幾多呢？45億都無！買入的投資者有無諗到，其實你買的股份隨時入唔到閘呢？定還是你好老定，睇死大戶實會於通車前炒到個市值達標呢？
假如個個都亂咁博大霧，最終卻發現自己入錯咗「掘頭巷」呢？又或者，假如有一隻股份於今輪檢討入面是達標的，但於經歷一輪市場洗禮後，市值又回落到50億樓下無得冧莊要畀人DQ（踢走）的話，股價又會唔會遭受到不必要的波動呢？大家花少少時間諗吓，係咪真係要冒呢個險呢？
富昌金融研究部總監 譚朗蔚（作者為註冊持牌人士）