絲絲講場：新濠博亞「沐梵世」現真身

呢個係新濠天地全新第五幢酒店，以希臘神話中嘅「夢之神」Morpheus來命名。

預算78億 一八年開幕

新濠博亞娛樂主席兼行政總裁何猷龍話，「沐梵世」建築預算為10億美元（約78億港元），將於一八年開幕。要到一八年先可以投入服務，主要原因係建築結構複雜，亞洲之前未曾興建過咁樣嘅大廈。連絲絲唔識起樓嘅都一睇就覺，「沐梵世」肯定會成澳門新地標。

酒店大樓建築之複雜，亞洲首見。

「沐梵世」室內設計華麗。

呢個項目坐落喺澳門路氹新濠天地，樓高160米，共39層，總樓面面積15萬平方米，提供約780間客房、套房、空中別墅及複式別墅，設施包括頂樓特色餐廳、酒吧、離地面130米高嘅空中泳池、貴賓廳娛樂場等。

雖然項目仲起緊，但絲絲尋日見好多嘢已經睇到雛型，「沐梵世」大堂將高達35米，大樓分東西兩座，日後各設六部高速子彈升降機。

今年三月底「建築女王」Hadid突然心臟病走咗時，絲絲幾唔捨得，估唔到佢原來留低咗呢件咁令人讚嘆嘅遺世傑作。啲勁出名嘅劃時代建築，想睇通常要搭飛機，仲多數喺外面離遠咁齋睇！今次「沐梵世」不但唔使飛幾粒鐘，仲可以Book嚟住喺入面睇，想像吓攤喺張超豪酒店床上，對住個勁Cool落地玻璃窗睇日出日落……嘩！（噢Sorry，又失儀咗添。）

余絲韻