絲絲講場：入境要隨俗 就大媽 香港寬頻被改名

中港上周五晚聯合公布，深港通將於十二月五日開通，尋日各大投資者梗係要睇實被納入深港通轄下嘅「港股通」股份表現，尤其是現時「滬港通」所冇嘅102隻新增股份，隨時短炒一轉賺鋪勁。

「寬頻」竟變「寬帶」

深圳證券交易所網站上有個「深港通南下港股通股票名單」，係深交所子公司中國創盈市場服務搞嘅。

深交所張名單唔睇由自可，一睇就出事喇！咦，有隻股份畀深交所改咗名，就係「香港寬頻」變咗「香港寬帶」。寬頻喺內地叫「寬帶」，唔通怕內地啲大媽唔曉，所以深交所溫馨到索性將人哋個公司名改埋做「香港寬帶」？！

一粒字令股價跌？

結果？嗱，尋日深港通旗下多隻新增股份炒上，但就唔多覺有香港寬頻份，香港寬頻股價尋日一開市就跌1.28%，整日浮浮沉沉，收市報8.58港元，仍跌0.35%。唔通係啲大媽攞住張名單，搵唔到「香港寬頻」呢隻滄海遺珠？

再睇睇，尋日新增嘅102隻股份中，計埋香港寬頻都係得大約10隻股份逆市跌，不過人哋嗰9隻多數係之前曾經偷步炒上，獲利盤居多。炒唔上咁你話同「寬帶」有冇關係？一粒字可以有幾天壤之別？齋睇三星嘅Note 6與Note 7就知，名唔可以亂改，今次仲要係「被改名」，真令人擔心。

余絲韻