北水頭等倉：石藥集團中長線可取

事實上，現時利率期貨顯示，美國於十二月加息的機會率近乎百分百，市場已對下月美國加息作好心理準備，只是在觀察聲明暗示加息速度如何。回看息口敏感股方面，針對內房股，標普預期阿爺仲有調控措施出台，估計明年內房整體銷售最多跌一成。

由此可見，基於大家都知內房係燙手山芋，另一方面人行又嚴厲堵截資金外流途徑，內地資金狂搵出路，最終會唔會兜咗個大圈又流入A股，製造「逢七」之年爆煲前的大時代？反正唔驚得咁多，煮到埋嚟先算！

個股方面，石藥集團（01093）前日復牌，證實位於石家莊市的附屬，收到該市大氣和水污染防治指揮辦公室發出的調度令，要求該市所有製藥企業停產，並在未經市政府批准下，不得恢復生產。

市場反應十分理性

公司表示，集團產品銷售在短期內可通過庫存滿足，預計近期經營情況不會受到重大不利影響。見到石藥周二復牌低見7.43元，但好快就止跌回升，全日高位見8.06元，昨日更一度衝上8.18元，惟尾市現獲利回吐，收報7.84元，跌2.6%。

老實講，石藥主要生產設施在石家莊，所以說毫無影響就未必，但只要霧霾改善，相信類似石藥這類龍頭藥企可申請盡快復產，故市場反應都算理性。如果呢關平安無事，相信該股短期在7.5至8元整固過後，後市仍有機會試破高位8.59元，中長線可繼續持有。

司慕渢