最近，金魚缸內流傳住一個係人都解答唔到的問題，就是「深港幾時通？」自阿爺於八月十六日正式批准了深港通方案後，市場一般相信包括系統測試等在內的準備工夫需時三個月，而港交所的行政總裁李小加，就預期是十一月下旬的某一個星期一。
市場此前預期深港通會於本月二十一日星期一開通的，結果到十八日星期五的簡介會上都未有結果。於是市場又退而求其次，開始預測二十八日或下月五日喇！其實好多人都唔明：遲遲唔推，到底等咩？
有人話，人民幣於過去連跌十二、十三日，走資都走到暈，中央實在唔希望於目前開多一條渠道黎畀資金走出去！
計我話，深港通未開啫，滬港通開咗啦嘛。真係要走的，滬港通應該日日爆額啦！莫非資金唔曉得從上海走，只曉得從深圳走咩！
那其實是等甚麼呢？李小加話：等一聲槍響。他咁樣比喻就好笑喇！短跑的健兒們個個荷槍實彈，蹲着身「get set」了個幾禮拜喺度等衝，只是槍聲未響於是遲遲都未能夠「go」，膝頭都痛啦！難為李老闆佢於上個星期五仲話要等多「好幾天」！唉…再等落去雞唔飛狗都走啦！
要預測深港通的日期，不如參透下滬港通係幾時公布啦。話說，梁振英一四年十一月九日參與APEC時同習主席會談，之後滬港兩地交易所就於翌日即十一月十日的收市後發表聯合公告，宣布滬港通於十一月十七日即是一個星期後開通喇。咦！梁振英於星期一已見咗習主席，唔知文章出街時有消息未呢？
富昌金融研究部總監 譚朗蔚（作者為註冊持牌人士）