絲絲講場：上商新總行擺鮮菠蘿陣

上海商業銀行喺中環嘅總行啱啱完成重建啟用，尋日請傳媒去參觀。一上到大堂，甲級商廈氣派預咗梗有，估唔到有樣嘢更吸睛。係乜？係菠蘿，係新鮮嘅菠蘿，仲唔止一個！

甲級商廈放新鮮菠蘿做擺設，依家興？上商仲足足放咗七個菠蘿咁多！原來為攞風水意頭，上商話菠蘿喺台灣叫鳳梨，有「豐利」嘅意思。放足七個咁多，就因為「七上八落」，「七」代表步步高陞，所以上商行政總裁郭錫志個Office都喺七樓咁話。

其實新大樓唔單止迎合風水，設計上亦好體貼員工需要。上商總行特登留咗層做Open Area，畀員工休息吓、食吓Lunch咁。唔止咁，佢哋仲特登劃咗間房畀啲媽咪，方便佢哋儲起母乳，放工拎番屋企育嬰。咁體貼，抵讚！

尋日除咗參觀上商總行之外，絲絲仲有機會一飽口福，一嘗上商廚房嘅手藝。事關上商個自家廚房喺銀行界出名好食，主打正宗上海菜式，同恒生銀行（00011）嘅招牌蛇羮有得揮！絲絲尋日就試咗清炒蝦仁、鎮江肴肉同熏鴨等等，諗番都回味無窮！

余絲韻