絲絲講場：上市改革關火雞生菜事？

揶揄潛在利益衝突

上市改革喺香港足足拗咗成五個月，無論反對派定支持派，各有堅持，互不妥協，俗語有謂「雞同鴨講」，真係唔知點收科！最近就有人用「火雞」嚟形容反對派，話火雞就梗係唔鍾意聖誕（聖誕節傳統要食火雞）！咁講法係揶揄現行上市架構制度有利投行、核數師、上市公司、律師行咁，佢哋有潛在利益衝突，就梗係要反對上市改革！

呢個比喻，即刻令人聯想番○二年有法律界中人嘅一句經典「金句」。

當年市場出現大批問題新股，有法律界中人反對由港交所做前線監管，仲講咗句「唔可以畀兔仔管生菜！」（兔仔鍾意食生菜）。

事後港交所當然反駁，話咁講係誤導兼唔公平，事關喺兔仔同生菜之間係有圍欄嘅咁話！意思即係，港交所有機制避免利益衝突，新股係由專業人士組成且獨立嘅上市委員會負責審批。無論點，市場對呢句名句一直津津樂道。

絲絲估唔到嘅係，原來事隔十幾年，當年嘅經典金句，今時今日仍大派用場，唔通個世界真係無變到？

余絲韻