孖妹S檔案：狂人概念 炒股特訓班

陸：恒生私人銀行及信託服務主管 陸庭龍

期望倘落空恐冧市

Kitty：狂人上場，係咪要重新執過個股票倉？

陸：特朗普勝出令市場意外，但市場震盪好快平復咗，依家距離一月二十日佢上任成為美國總統都仲有差唔多兩個月時間，焦點會睇吓佢係咪會實行佢之前嘅競選政綱同言論，其實佢就任後政策先會落實，依家（市場）只係純炒作嗰啲本土經濟、起鐵路，同埋可能放寬銀行監管（嘅主題），加上佢打算廢除奧巴馬所提出嘅醫療系統，亦令生物科技醫藥股份被炒上，但只屬短期市場操作，唔係真實反映佢對市場或經濟嘅影響。

陸：特朗普真正對市場嘅影響，應該要等出年上半年落實咗政策先睇到大方向。每一任美國總統在位，首要任務都係刺激經濟，以前奧巴馬年代都會運用聯儲局推行減息、買債、擴張資產規模，去到特朗普就可能主力做啲實在嘅嘢，為本地人創造就業機會。

另外，一啲基建項目落實推行時，可能就可以加快經濟復甦，到時就會加快通脹，因應依家環球都冇乜通脹，而且已經處於超低利率年代七至八年，呢個年代有機會由美國帶頭終結。雖然聯儲局加息已經係一個信號，但佢加息加得慢，一年先加一次，睇到暫時加息意願同力度都唔大。

市場隨時套現避險

彩兒：你預計「侵侵」（特朗普英文姓氏Trump諧音）仲有乜花招救經濟？

陸：美國係一個消費大國，佢嘅GDP入面有近70%都係由消費組成，消費係來自就業機會，若然就業機會充足，民眾的消費就會增加，但現時美國就業情況，都係聯儲局唔敢大刀闊斧加息嘅原因，特朗普口中美國人優先嘅本土政策，好似頭先講嘅基建就有機會幫到就業。

不過，經濟同政策環節有好多，現時揣測佢冇乜意思，反而佢出年上任落實推行嘅嘢先有影響，但觀察期都有半年時間。

Kitty：有統計話，每逢美國有新總統上任，多數出現跌市喎。

陸：跌市又未必嘅，可以咁諗，好似公司嚟咗個新老闆，會有連串嘅新政策出台，咁究竟同舊政策有冇連貫性呢？咁市場就會解讀為有不確定性，所以就有機會套現避險，今年發生呢個情況嘅機會都存在，美國三大指數齊創新高，如果特朗普到頭嚟做嘅嘢又唔係石破天驚嘅，但佢依家又講到咁大嘅話，一旦出年交唔到貨，股市又有咁高預期，出年落番嚟唔出奇。

陸：撇除特朗普因素，環球經濟增長動力從邊度嚟？你要諗出嚟都難，中國、歐洲、日本都冇行，咁美國除咗選出新總統之外，都冇其他因素睇到佢經濟復甦動力好強，所以環球經濟根本都冇改變到，復甦動力仍然好弱，各國政府依然用貨幣政策去支撐經濟。

彩兒：特朗普概念股「升空」，追唔追得過？

陸：特朗普當選後，美元走勢強勁，美匯指數突破100大關，令人民幣連續受壓多日，預計離岸人民幣即將跌穿7算，未來深港通同滬港通會係畀內地居民將部分資產轉為港元股票嘅途徑，有利港股前景。

個別或步樽頸 慎玩

陸：另外，我相信基建股升勢仲會維持一段時間，近期部分原材料股同礦業股股價累升兩至三成，佢哋走勢或者會進入樽頸位，現時追入有機會買貴貨。放寬監管會唔會令金融股升好多呢？其實只不過係罰少啲錢啫，但係咁唔代表生意易做咗，又或者賺好多錢。

黎：時富金融優越投資服務部顧問 黎永良

估市參考對內政策

彩兒：特朗普當選後，個市Chok到大家心驚驚，之後股友應該點自保？

黎：大市完全冇方向感，因大家暫時唔知特朗普想點，想估嘅話，就要從佢政綱嚟估，但十個政客嚟講，大部分政綱都做唔到，只不過係譁眾取寵，係呃選票啫，但從政綱睇，佢着重國內多過國外，佢贏到係因為捉到低下階層嘅心理，有好多游離票，佢有講過「好多被遺忘嘅，唔會再被遺忘」，因應全球一體化之下，好多低技術工人做開嘅工廠搬咗出國，呢咋游離票就畀佢吸咗。

嚴守止蝕抗波動市

黎：短期內，市場摸唔清特朗普個底，所以股市會大上大落，明顯見到多程式交易，亦令股市更波動，所以大家要嚴守止蝕位。

Kitty：如果由佢政綱出發，可以點樣睇餸食飯？

黎：佢未來有機會刺激內部經濟，想召工廠返美國，會大肆起基建同刺激零售，刺激投資，現時美國通脹開始高番，經濟數據開始好，美國十二月好大機會加息，美國基建股、公路股及鐵路股等會有着數。

港上市出口股料升

黎：美國加息後，美元匯價趨強，從中國同香港角度去睇，美元強、人民幣就會弱，理論上對香港上市嘅出口股有幫助，美元強就會利淡入口股喇，所以呢排內地航運股同港口股都上晒。一啲同美國做生意嗰咋股份，特別係工業或零售股，因為特朗普會大力推動當地經濟、基建，起樓會起多咗，所以見到資金追入。再者，我會睇好內地國策股，因為國家扶持有幫助。

彩兒：我哋可以點樣防止中伏？

黎：另外，航空股通常都係持有非人民幣外債，大部分都係美元，所以美元強會令呢類公司壓力大咗，因為還債自然會還多好多；仲有一啲需要由外地輸入原材料嘅行業，原材料多以美元計價，例如係造紙業，所以亦會有弊處，部分紙業股股價已經見回調。

黎：再由特朗普政綱睇，佢或者未必咁鍾意向外，東海/南海方面會喘定，部分軍工股有小量沽壓，相信佢一定唔會似希拉妮或奧巴馬咁鷹派，有關於TPP（太平洋夥伴關係協定）存在變數，相關個股走勢都唔掂，如果佢主力對國內，相信對亞投行同一帶一路都有幫助，令唔少鋼鐵股漲晒，但要留意，佢上場後會有好多變數，上場後或者未必跟政綱行，值得注視。

彩兒 Kitty