Market Insight：汽車股基本因素好

美下月加息機會大

近排美國加息預期升溫，利率期貨顯示十二月加息機會率高達九成五，除非下月初公布的十一月就業數據離晒大譜咁差，否則下月中聯儲局議息，再出招應該是沒有懸念。

深港通未有着落，十一月通車機會幻滅，上周港交所（00388）行政總裁李小加續派定心丸，強調應會在某個星期一，但不應接近聖誕假期，加埋月尾MSCI指數調整，波動難免，似畀貼士大家好大機會在十二月上旬正式通車。其實遲兩、三個星期，影響心理居多。

近期人仔愈跌愈急，內地避險走資需求與日俱增，君可見近期港府在樓市加辣，除了阻到港人置業換樓外，對內地買家一啲影響都無，畀足三成印花稅的內地客依然絡繹不絕，盲搶樓情況好似唔使錢咁。

招商證券爆發力強

內地豪客來港掃資，由過億豪宅到呎價超過三萬蚊的蚊型單位，一句豪比你，三成印花又如何，全部掃一餐。講到底，係除笨有精，如果人仔一年貶值5至8%，今日畀的印花稅，三幾年之後匯率變動已經喺番度，可以想像滬股通同未來深港通，阿爺畀條合法渠道將錢下來，只要買持有港、美元資產為主的上市公司，一樣起到抗貶值的效果。

滬深股民可以合法下來香港買股票，減低貶值傷害，邊個最着數，唔使講一定係券商，上周見半新股招商證券（06099）破頂，以上市新高12.5元收市，揀佢唔係貪佢基本因素特別好，而係十月先上市，街貨夠歸邊，炒上去爆炸力會比其他幾隻券商股強，短期趁深港通消息落實，短炒有得諗吓。

靈活走位最為重要

今個月明顯見到一個現象，就係基金在積極調配資金重新部署倉位。例如低迷咗好耐的資源股，基金相關股份持倉偏低甚至係零，但當發現宏觀因素可能有變，各路資金入市追貨，足以在短時間內推動呢類低迷股份急升，江西銅業（00358）係一個好例子。

行業政策未有大變

此外，指數重鎊股持倉調配的蹤迹亦不難發現，就如近期滙豐控股（00005）轉強而騰訊控股（00700）轉弱，其實不能獨以業績因素解釋騰訊股價弱勢，何況騰訊業績唔差。

再看今年汽車股板塊表現跑贏大市，龍頭股比亞迪股份（01211）股價由首季32元水平升至高位見57.25元，但九月以來股價反覆回落，至上周四低位44.9元，調整期間公司基本因素及行業政策未見太大變化，類似反高潮情況還有吉利汽車（00175）及廣汽集團（02238），可能純綷因為基金調整持倉，沽貨鎖定利潤，將資金調配至其他落後板塊。

可能看官會問，如果隻股本身係好股，何須經常轉換目標？個人投資者有這看法，實在不足為奇，但在基金經理角度，身處上落市，只有在不同板塊強弱勢股中靈活走位，才能為持倉組合爭取跑贏大市的回報。

古勝