北水頭等倉：金蝶發展值得憧憬

雖然人民幣貶值，理論上會影響中國資產投資價值，但實際上今時今日中國經濟仍穩定，相對多事之秋的歐、美，還是不失投資價值，更有分析指美國候任總統上場後，中國在國際間只會更強大，應獨買中國，是否如此，不妨放長雙眼慢慢睇。

美國候任總統特朗普第一件對股市的貢獻，乃帶動金屬商品期貨價格及相關股份上升，皆因其大興基建的計劃為市場提供炒作藉口。

不過，連升過後，昨日相關股份回吐，江西銅業（00358）跌4%，反而後起的航運股接力，中外運航運（00368）再升7%。但若特朗普真係搞保護主義，全球貿易勢受影響，所以筆者對航運股有戒心，加上板塊升勢並唔全面，都係齋睇為妙。

深港通重點目標

深港通特性係多咗中小股可以炒作，一些內地知名的品牌會是市場焦點。例如體品股安踏體育（02020）、李寧（02331）；IT品牌如金山軟件（03888）及金蝶國際（00268）；零售牌品如中國利郎（01234）及國美電器（00493）等等。

金蝶好就好在唔算炒上好多，昨日收報3.17元，跌0.6%，往績市盈率69倍，但喺大媽眼中就唔覺有問題，皆因A股科網股估值普遍如是。

近年金蝶業務正處向雲端轉型及升級時期，目標三年內雲服務收入佔比由兩成提高至五成，相信成功轉型後，盈利基礎會更穩固，中長線前景展望向好。若未來兩周深港通概念股又翻炒，此股能以大成交突破3.2至3.3元阻力區的話，可小注跟進，博上3.6元，失守3元關止蝕。

司慕渢