絲絲講場：AIA推真人視像櫃員機
近年搞得金融就一定要講FinTech（金融科技），啲香港銀行一間二間都推甚麼i-Teller、VTM，早排連財仔都整部視像櫃員機招呼客仔。仲未試過？你小心真係Out，事關依家連保險公司都玩埋真人視像櫃枱，搞埋索償申請都得！
將擴展至私家醫院
友邦香港最近就引入咗業界首部真人視像服務「AIA iCare自助服務櫃枱」，呢部iCare自助服務櫃枱點玩法？佢嘅概念類似銀行嘅視像櫃員機，投保人可以實時透過櫃枱同服務大使進行互動視像對話，即時處理個人醫療保單同提出索償申請。目前呢部真人視像櫃枱只設於友邦其中一間網絡醫療中心，日後會擴展到更多醫療中心同私家醫院。
之前聽過啲Banker講，Run幾部人肉視像ATM，銀行大概10個人就可以孭起晒，絲絲當時已經為啲前線銀行從業員覺得心寒，依家連保險行都玩埋一份，咁落去，仲有咩唔係人肉視像搞掂？會否好快連視像入面個「真人」都慳番，索性Animation搞掂，到時畀埋客仔揀「服務大使」咩髮型、皮膚眼珠乜色、着乜衫都仲得……諗多咗？話唔埋。
余絲韻