絲絲講場：港投資排名跌多得大款

過去一年內地資金湧入香港物業市場，無論商廈定住宅物業都搶貴晒，以為內地人買港樓只係為咗投資？咁你就實在太low（遜色）了。有會計師行發表最新報告話，呢啲內地豪客除咗投資，更加係為咗擁有心儀嘅標誌性物業！多得呢班「收藏家」夠豪，結果間接令香港地產投資市場排名下跌三級咁囉！

城市土地學會（Urban Land Institute）同羅兵咸永道尋日發表《2017年亞太區房地產市場新興趨勢報告》，報告指出去年內地企業掃咗大量核心商業區嘅甲級及乙級寫字樓，推高晒啲租，原本長期駐紮當區嘅企業就被迫搬去九龍東嘅二級商業區。

羅兵咸永道亞太區房地產稅務主管蘇國基解釋，內地資金湧入物色核心商業區甲級寫字樓租賃物業同地標性物業，係為咗擁有心儀嘅地標性物業，「正所謂『千金難買心頭好』」！

個報告真係問過受訪者，「內地買家唔係為咗投資或者擴展海外業務先嚟香港買樓，有國企表明只係想喺香港擁有一幢物業！」

根據報告做嘅亞太地區地產市場投資前景調查顯示，一七年最受歡迎市場排名出現落差。

去年核心市場日本、澳洲就最受投資者喜愛，香港排名就由去年第15跌落第18，主因缺乏大型資產物業交易、物業投資回報低咁。絲絲心諗，樓價搶到天咁高，回報唔低先奇！

余絲韻