孖妹S檔案：黑天鵝頻現 輪商新轉機

市場波動 刺激炒作

葉：中銀國際股票衍生產品部聯席董事 葉滙豪（George）

彩兒：行內成日有人話世界難撈，你有同感嗎？

葉：我入咗行唔耐，只有兩年，又唔太覺！近幾年比較難捱嘅係大市好多年都趨向淡靜，除咗英國脫歐公投，又或者好似上星期美國特朗普當選嘅政治事件，令大市有成千點波幅外，市況淡靜成為咗港股常態，每日波幅好細，好多時大市開定咗之後，全日就只係幾十至一百點上落，成交亦偏低，好多時大市計埋衍生工具，成交就得嗰五、六百億元。

買衍生工具唔同買股票，買股就要望個市升，買衍生工具最緊要係有波幅，畀投資者喺即市有買入同賣出嘅機會，但近幾年機會少咗，投資者買輪意欲係減低咗啲。

葉：可以咁講，買開嘅投資者就會買，冇買開嘅，就因為大市波幅細，好難吸引新投資者進場。

Kitty：同股友提到牛仔、熊仔，有啲人真係耍手擰頭。

葉：見唔到牛熊證市場縮得緊要，相關成交同街貨仍然相當活躍，不過，目前產品好集中喺恒指，個股牛熊證無論係成交定街貨都絕少，雖然牛熊證面世已經有十年，但投資者買賣習慣仍然好集中喺指數度，即使有好多輪商有推個股牛熊證，例如藍籌股，但成交唔活躍。

彩兒：好似極少聽到輪界增聘人手咁？

葉：輪證部門一向人手唔多，我哋部門有6個人，未來會維持呢個人數，通常要一腳踢，多啲嚟、密啲手，八點要返到公司，睇吓前一日嘅Report，行家與自己公司有乜產品較受歡迎，調整策略，睇吓應該用乜嚟做推廣焦點，同行家主要競爭就在於開價係咪公道。

做過主播有助銷售

葉：依家Lunch得一個鐘，我哋嘅優勢在於公司有Canteen，唔使落街同人逼，1點我哋就要坐定定，因為預咗開市要聽投資者電話，例如開價要求等，除咗見客，都絕少出街食晏，真係有少少Dry！

Kitty：你以前都曾經做過男主播，會唔會覺得自己冇女主播咁有競爭力先？

葉：搵主播做衍生工具銷售，主要係因為個樣啲客會見過，有親切感、有口才、又可以即時消化資訊Update啲客，形象亦有一定說服力。請靚女係咪好啲？呢樣要問老闆！

提升科技 鬥快開價

X：不願具名的資深市場人士 X

Kitty：我唔開你名，老老實實，依家窩輪市場市道點啫？

X：其實近幾個月，因應市場有好多政治事件，令個市旺咗好多，單係睇今個月四號至十號資金流入開倉倉位已經多過年頭首3個月，雖然上星期四波幅已大幅回落，但係都唔緊要，傳統年尾市道都例靜，加上上半年市道咁差，大家都估唔到年尾咁爆，應該都賺到滿意，可以慢慢收爐。

港落後不及台多變

X：若然將今年市道同舊年比，當然係會差咗，皆因舊年年中大時代基數高，但係同前幾年比就唔覺差嘅。過去金融機構收埋輪枱，從來都唔係因為唔賺錢，係講緊取決於整體證券業務，其實好多金融機構都掙扎緊係咪應該摺埋投行業務，當初渣打、荷合等離場都令市場嘩然。

彩兒：行內咁多間輪商年年都大鬥法，依家有乜新招？

X：可以話係各師各法，依家已經唔會好靠廣告同Marketing喇，落少咗好多廣告，反而多咗內部嘢嘅提升，背後做好多嘢，最緊要睇吓啲機夠唔夠快，咁開價夠快先夠人爭，由科技出發，所以每間金融機構都要加強投入，因為部門一體化，都好難睇到單單輪枱要投入幾多。

Kitty：未來一年輪場會唔會有新一場腥風血雨？

X：我覺得整體唔會有大改變，因市場成熟，會傾向精簡化，但產品就唔覺會有乜新發展囉，事關監管機構拖住市場後腳，衍品市場喺11年前推出牛熊證之後都冇新產品。拎ETF嚟睇，佢係畀人推反向同有槓桿產品，但只係推埋晒啲冷門指數產品，冇恒指，同市場脫節，完全係交功課心態。

X：睇番亞洲區其他輪證市場，香港真係好落後，太耐冇新嘢，好需要追番，例如台灣會有商品相關嘅牛熊證、牛熊證可用Day Close做Logout同用全日平均價嚟做結算，起碼有更多變化。

縮差價吸引翻頭客

蔡：法興證券上市產品銷售部副總裁　蔡秀虹

彩兒：聽聞即將有新輪商入場，唔通大家覺得好好景？

蔡：一定唔係容易做喇，只會愈嚟愈難做，行內競爭好大，投資者成熟性高，產品條款差唔多嘅選擇有好多，因為資訊流通，市場透明度愈嚟愈高，加上香港經濟又唔好，所以都有影響。

不過，睇番市場成交去計，其實投資者熱衷程度係差唔多，但係賺大錢嘅時間已過晒，○七、○八年嗰陣，輪證市場氣氛就最熾熱，依家相關成交同○七年比少咗約一成。

發行商對沖添難度

Kitty：近期大市波動性高咗，有冇跳番Part開心舞？

蔡：雖然大市有波動對於我哋嚟講係好事，好似上星期美國大選，資金都留意多咗輪證市場，但對於我哋嚟講，風險都大咗，因為都需要緊貼市況做對沖，成條枱都好緊張。

另外，即使上星期個市咁波動，為咗投資者有更好嘅輪證投資體驗，我哋整體平均買賣差價都只係1.5格，隨時係蝕住做，主要都係想有翻頭客咋！

蔡：另外，因為唔少投資者炒開股，佢哋好多時揀輪係會睇成交，不過輪唔同股，輪係有莊家開價，所以唔係有大成交先賣得出，揀輪反而係應該視乎買賣差價，我哋好想扭轉佢哋嘅諗法。今年內，整體輪商嘅平均差價係約2格，法興就只係約1.2格，所以都好過市場平均表現。

若有料報畀彩兒同Kitty或有嘢問，可電郵money.biz@on.cc

Kitty 彩兒