Market Insight：國際銀行股可避險

他曾於政綱中話不惜有赤字預算，都要大搞基建，令建材、資源價格爆升，十年美債孳息由選前大約1.8厘抽到上周五的2.11厘，返到年初水平，強美元、息升及新興市場撤資回流美元資產的不利因素，好似全部衝住港股而來，把深港通即將通車的憧憬完全抵銷。

世事如棋 要識落車

最大鑊係市場反應會唔會係一廂情願，真係講唔埋。上周鋼鐵股熱炒，馬鞍山鋼鐵（00323）、鞍鋼股份（00347）等爆升，到底中國鋼鐵業會因為特朗普大興土木的政綱引發需求同價格回升，抑或受累美國本土優先，再成為反傾銷戰場上的犧牲品？世事如棋局局新，真係無人敢寫包單，抱住搵快錢心態的，緊記個勢轉要識得落車，千祈唔好死牛一面頸。

債息回升有利有弊

特朗普經濟顧問放風唔會將聯儲局主席耶倫落鑊，但共和黨大花筒的傳統，特朗普話要推基建創造就業，已經令個市預期美國通脹復辟，美債超低息日子告終的可能，唔使等倫媽出手，債息經已先行一步。

對於一眾追求高息的一族，短期真係要小心，業務無乜境、純追息的中電控股（00002），上周五見沽壓唔細，隊到落下半年新低，領展房產基金（00823）及幾隻基金重倉的房產信託基金亦然，看來高息股的調整會持續多一陣子，但美國長債息回升，孳息曲線斜度再現，國際大型銀行好似滙豐控股（00005）及渣打集團（02888）等財資收入會有幫助，短期極可能會跑贏個市。

早幾個月當德銀傳被美國司法部重罰，國際銀行跌到一仆一碌， 點會估到幾個月之後，大笨象股價輾轉返到近三年高位，金融海嘯後環球市場氛圍轉變之快，適應唔到易被股海吞噬。

醫藥股前景看高一線

希拉妮一直主張藥物降價，現時失落總統之位，美國多間大型藥廠可以話鬆一口氣。不過，特朗普當選之後幾日，已經一改競選時的態度，曾經話會廢除奧巴馬醫保改革，但依家就話將會保留部分內容，藥企的前路仍有待觀察。

至於內地醫藥股，近年中央推動醫改，行業曾經歷過藥物降價，高價專利藥首先受到影響。改革進一步落實，相關文件、政策細節陸續有來，不過市場的憂慮大部分已消除，喺內地經濟轉型之下，市場對於屬新經濟概念的醫藥行業，看法普遍正面。

對藥企而言，藥物降價對盈利有影響係正常，而中央同時鼓勵創新藥的開發，研發能力高的藥企，前景仍可看高一線。石藥集團（01093）中期純利按年增加25%，收入增加7%，其中創新藥業務繼續錄得強勁增長，收入按年上升28%。

另外，藥物降價，令部分藥物變得普及，從事分銷的國藥控股（01099）、上海醫藥（02607），甚至係做代理的康哲藥業（00867），應可受惠。早前美銀美林發表報告指，跨國藥廠傾向將成熟產品賣畀內地領先製藥企業，康哲預計能率先受惠，故將其評級上調至「買入」，目標價15元。

古勝