絲絲講場：得罪「狂人」 硅谷巨頭閉翳
特朗普喺美國總統大選爆冷跑出，今日有外媒特別撰文，話依家硅谷科技界大佬一定有排震無得瞓，因為佢哋之前落場反對特朗普。當然，大家反對特朗普皆因佢把臭口。睇過班科技富豪對特朗普發表過嘅毒舌言論後，唔怪之得大家咁怕會有大報復！
Apple亞馬遜全有牙齒印
首先，最唔妥特朗普嘅肯定係Apple庫克，雖然佢冇公開反對特朗普，但特朗普宣稱要Apple搬廠返美國，唔搬咁曳就徵收重稅。而且早前Apple拒絕配合FBI，幫恐怖嫌疑犯嘅iPhone解鎖，特朗普嬲豬，叫美國人抵制Apple產品。狗急都會跳牆，庫克唔反特朗普就有鬼囉！
咁facebook朱克伯格點解唔鋸特朗普？咪因為種族多元化。特朗普成日掛嘴邊：為阻止非法移民進入美國，要喺美、墨邊境修建萬里圍牆。而特朗普成日攻擊亞馬遜，話貝索斯買《華盛頓郵報》係為避稅，搞到貝索斯佛都有火，甚至話佢會喺旗下發展嘅火箭上留番個位俾特朗普。
另外，有一大班硅谷富豪雖然冇以毒舌言論反特朗普，但都講明唔會選佢。邊位？好似微軟蓋茨、谷歌佩奇及Tesla馬斯克等。
余絲韻