雖然港股市況麻麻，但最近證監會一號牌仔（證券交易）嘅負責人員（Responsible Officer，RO）喺行內卻非常搶手同吃香，人工又高。絲絲聽聞有從業員竟然「博大霧」，未有相關管理經驗都照樣向證監會申請做RO，博證監會未必會向上手公司做Reference Check（驗證），結果成功申請到做RO！
根據證監會勝任能力指引，證監會要求RO申請人，喺緊接申請日前嘅6年內具備3年相關行業經驗，及最少兩年嘅管理經驗。RO向證監會申請時，除一般申請書外，都要提交行業CV（履歷表），列明過往工作經驗。
有證券界人士講，近年一號牌的RO行情急漲，人工比普通員工（如盤房、客戶服務等）最少高出幾倍，因此好多從業員都想申請做RO，但有啲從業員明明未夠班，都照「博懵」，「吹水」話自己有相關管理經驗，同證監會申請做RO。仲話呢個情況其實一直已存在，證監會又未必單單都有向從業員的「舊舖」（上手公司）做驗證。
嘩！講到呢度，絲絲都有啲愕然。一來，誤導證監會好大鑊喎，使用虛假文書更隨時一身蟻，二來，證監會都要睇實啲好喎！
余絲韻