絲絲講場：樂視賈總「情信」一句話失50億

話說賈躍亭早兩日寫咗一篇5,800字嘅「情信」畀員工，點知當中一句要「深度反思樂視燒錢擴張模式」就嚇親大家，昨日其控股嘅酷派集團（02369）同A股上市嘅樂視網股價大冧，單日市值共蒸發逾50億元，12字平均每字值4億！

燒錢擴張榨乾資金鏈

情景係咪似曾相識？上周facebook高管一句「預期未來公司廣告收入或見頂」，搞到教主朱仔身家即刻唔見咗300億元，簡直就係翻版。

提到樂視，大家自不然諗起賈躍亭呢兩年東征西討，積極擴張樂視嘅商業版圖，但亦好關注公司不斷燒錢嘅策略。早排已經傳緊樂視資金鏈緊張，正當今年公司成立12周年之際，賈總突然寫咗一封致全體員工嘅內部信，坦言樂視嘅資金同埋資源其實非常有限，主因係樂視汽車前期投入太過巨大，已經用咗百幾億嘅自有資金。

收一蚊人仔年薪「贖罪」

賈總話：「樂視蒙眼狂奔、燒錢追求規模擴張同時，全球化戰線一下子拉得過長」。因此佢係時候要反思，日後七大生態快速擴張要告一段落。佢仲宣布會承擔責任，由即日起自願永遠只收公司一蚊人仔年薪喎。

此話一出嚇親金魚缸，由樂視控股嘅酷派遭洗倉，急插最多兩成，收市都跌差唔多18%，單日市值唔見咗11.5億；而樂視網就跌近5%，市值蒸發咗37億人仔。嘩，大拿拿單日就唔見咗50億有多，真係雪上加霜！

余絲韻