孖妹S檔案：港股市勢震盪 兩派玩法大不同

希拉妮陣營 趁早買定 博升700點

黃：財經評論員 黃志陽

盧：天王國際金融行政總裁 盧楚仁

Kitty：希拉妮民調支持度日日變，佢仲咁老定，我哋係咪可以跟佢搵兩餐飯食？

黃：我嘅睇法係希拉妮贏嘅機會大，雖然最近民調顯示，兩者支持度不相伯仲，但特朗普作風極端，相信當地選民最終會選出作風較穩陣嘅總統。

黃：一旦希拉妮贏咗，相信大市走勢會好番啲，早前跌市元兇係特朗普支持度上升，似乎贏面較大，我相信喺選舉日有希拉妮勝算較大嘅消息，例如係喺一啲重要州份勝出，有機會刺激恒指飆升600至700點，短線可上望23,700點，香港應該都有Live(目及)實，到時可靈活走位。

煤炭券商股料突圍

彩兒：希拉妮未上任已推冧多間藥廠股價，究竟有冇啲希拉妮概念股呢？

黃：有啲人覺得美國出口股有希拉妮勝出概念，原因係佢嘅對華政策冇特朗普咁極端，出口股有機會受惠，但我覺影響唔大，反而可留意一啲最近跌番落嚟嘅強勢股如煤炭股，或者有機會受惠深港通開通嘅券商股。

黃：之前市場憂慮特朗普上場後，會將美國加息步伐加速，令地產股跌咗落嚟，上述板塊投資者可部署定，一旦希拉妮如預期贏出，呢啲因特朗普上台機會上升而受壓嘅股份就可進行反彈，尤其是香港地產股。

Kitty：幾時先可行動？好多股友好手痕……

黃：以上板塊現時已可留意，特別係內險同券商股早前受壓，未來再跌機會唔大，投資者不妨現時部署定，率先買入；另外，主要問題在於大市幾時見底回升，若恒指繼續偏弱，今、明兩日會見22,400點，若到呢個水平，我建議可買煤炭股。

黃：內險股中，中國平安（02318）頭三季業績靚仔，包括新增業務、壽險及銀行業務增長都比同業好，A股近期表現算硬淨，公司年底投資收益可望亮麗，可作首選。此外，銷售數字好嘅內房股值得追入，龍頭股中國海外發展（00688）係不二之選；香港地產股就建議揀龍頭股長實地產（01113）同新鴻基地產（00016）。

美元倘反彈沽Euro

彩兒：匯市又可以點玩？

盧：不妨等大選有定案先做部署，我有個陰謀論，係華爾街同希拉妮較Friend，所以現時唔會有太多投資動作以免影響選情，若大選有結果前，美元一直偏軟，我預期大選後美元會出現短線反彈，到時可沽歐元或加元，前者將受意大利修憲公投影響，後者就因油價有機會大漲後回調拖累佢走勢。

盧：若美元喺有大選結果前牛皮，預計選舉後會出現跌勢，到時可買入最受惠外幣，如日圓同埋澳元、紐元。

特朗普陣營 環球市預坐過山車

雷：「基金教父」 雷賢達

黃：晉裕環球投資研究部投資策略師 黃耀宗（Andy）

彩兒：雷生點解你會覺得特朗普贏面唔細？

雷：金融業或擔心佢睇法難測，未必撐佢，若中下階層及工人階級傾巢而出投票，佢好可能贏，佢政綱提到減稅，對投資市場或經濟增長有幫助。

Kitty：特朗普一贏，股市短線實凍過水？

雷：一旦特朗普勝出，因應投資者缺乏心理準備，環球股市短線會出現急跌，睇番港股，好難估佢下調幅度，其實港股由年頭摸底，喺約19,000點一路升，升至約24,500點，升咗五千幾點，依家繼續調整一啲都唔奇！唔排除環球股市急插後，會出現短暫反彈，震盪會係大而快；我又唔覺得美元會轉弱，相信長遠會高於現水平。

宜轉身快 短炒主打

雷：睇番香港經濟，樓價愈高，樓市泡沫爆破機會愈大，加上今年大市波幅近六千點，全年波幅喺4,000點內先算合理，投資者對牛市有戒心，再升機會唔大。即使有深港通刺激，但我覺得影響係較長期，依家唯一好在內地資金充裕，行寬鬆幣策，某程度支持中國經濟增長，但背後依賴貸款與貨幣增長，後遺症令人擔心。

彩兒：Andy，你私心想特朗普呢隻黑天鵝上場，唔通你份人好似佢咁瘋狂？

黃：好多人覺得特朗普上場，金融市場會出現大震盪，但我會睇遠少少，因佢嘅政綱入面包括中產減稅、富人加稅，以及增加基建投資等，長遠對商業發展而言係好事！短線睇，市場視佢上場為黑天鵝，佢一上場，金市同債市會即抽升，俗稱恐慌指數嘅美國VIX指數會勁Chok。

黃：近期有唔少資金寧願先離場避一避，等大選有結果先再入市，參考上次英國脫歐公投情況，一旦特朗普上場，市場震盪料只會維持一至兩周，到時希望入市嘅投資者最緊要轉身夠快，以短炒策略為主，皆因雖然佢嘅政綱係好偏激，但到時國會又未必會通過到，估計中線市況波動性會放緩。

Kitty：咁有乜短炒好路數？

黃：我相信特朗普贏到，金價會飆升，現時金價未完全Price In（反映消息），預計將升穿今年約1,370美元收市高位，保守投資者可睇1,450美元，進取可睇近1,500美元，止蝕位可定於1,240美元。黃金ETF亦係追貼金價嘅好選擇。金礦股已率先被炒起，相信到時都可受惠金價上揚，但緊記到時要喺一、兩周內食胡。

冇心水不如揸現金

彩兒：若特朗普贏，買債博一轉得唔得？

黃：債市對於散戶嚟講冇咁吸引，短線更有機會急速見頂，我唔建議追入債市，若冇投資心水，寧願揸Cash等其他機會好過。

香港時間周三上午將陸續知道選票比數，這對香港交易時間好有利，若特朗普領先，可考慮買入美股反向ETF，如XI未來標普（07322）用嚟做對沖或賭佢贏；若較資深嘅投資者，仲可用Long Put（認沽期權長倉）策略投資VIX指數期貨。

money.biz@on.cc

Kitty及彩兒