Market Insight：手遊股趁調整買貨

自年中開始，香港樓價重返升軌，專家估計樓價指數即將在年底前再破歷史高位之際，上周五港府在現有樓市辣招下再加辣，無三粒星或已擁有一間物業的，均要付上最高30%的懲罰性印花稅。

如果短炒甚至「摩貨」的樓市投機者，他們早於首輪辣招下已於市場消失，今次加辣，無疑會將想買住宅長線收租的投資客都一併趕絕，學唔到發展商可提供印花補貼及二按的二手市場，成交必然直插冷點，最慘得一注本錢，想換大啲住好少少都唔使旨意，換樓成本太過昂貴。

內地客有數得計

對於走資的內地客，究竟有幾大打擊仍有待觀察，周末新聞話已出現首宗30%稅金照付買千萬元住宅的成交，試從內地客角度諗，人民幣要貶值既成定局，若一年跌5至6%，一炮過畀30%印花稅，可以即刻有計落嚟用人仔換港紙買，幾年條數喺番度。唔信可睇吓近排虛擬貨幣bitcoin，因大媽狂掃上周成交創史上紀錄，三個月內兌人仔升值五成，相比講個信字的bitcoin，香港磚頭較實在，設身處地，在深圳河彼岸，揀買港樓定買bitcoin，大家心裏有數。

地產股震盪難免

樓價升跌關鍵是利息成本唔係辣招，上次辣招減慢樓市升幅，卻無阻大趨勢，不過地產股短期必然起震盪，究竟會令恒指今朝跌幾多？上周五夜期大致已經清楚，今日恒指好大機會開22,500點樓下，走勢上，似要先試七月底恒指升浪阻力位22,300點。

今個星期重頭戲美國總統大選，實在好難估計對金融時局會有幾大衝擊力，老老實實，唔怕特朗普爆冷勝出，至少好歹有個結果。

古勝深信民主國家，總統講得再兇恨，權力還是受到相當的制衡，股市一插到底之後慢慢恢復的情況可以預期，反而希拉妮若以接近票數勝出，特朗普又玩撒賴不接受選舉結果要求重點，股市仲煩，點都好，過埋選舉無耐，好快又到十二月意大利公投及美國議息，以為過埋今個星期天下太平，未免太樂觀。

IGG有力升多一浸

最近手遊股有資金追捧，上周五IGG（00799）及天鴿互動（01980）分別升3.4%及4.1%，博雅互動（00434）亦升0.4%。IGG專注手機遊戲業務，上半年相關收入按年增長26.5%至1.22億美元，佔整體收入比例亦由一五年同期的93.4%，上升至97.3%。

新遊戲表現不俗

作為遊戲開發商，食粥定食飯，好睇推出的遊戲受唔受歡迎及延續性。IGG的王牌遊戲《城堡爭霸》推出三年，至今仍帶來穩定收入，首季推出的《王國紀元》，八月份收入突破1,400萬美元，成為新的增長引擎。

天鴿互動收入主要來自手機產品，包括在線直播及手機遊戲，上半年純利按年倒退33%，不過次季表現已較首季改善。至於開發網絡棋牌類遊戲的博雅，中期收入按年跌近兩成，卻多賺七成半，期內銷售及市場推廣開支大幅減少86%。

走勢上，IGG股價於八月起動後，維持上升勢頭，最近集團多次回購股份，亦利好股價，應有力再升一浸。博雅上月初曾升至5.24元，其後反覆向下，若未能上破短期阻力4.7元，有機會跌穿4元。

天鴿互動14日RSI動力重現，守在10日及20日線5.2元樓上，有望挑戰九月高位6.2元水平。

古勝