個市死唔斷氣，呈現應跌唔跌姿態，上周連跌四日之後，昨日早市見過22,775點低位後，一度拗腰重返兩萬三點關口之上，見23,045點，最終收市僅跌20點報22,934點，再呈膠着狀態。最奇怪是美國總統大熱候選人希拉妮上周五受到新一浪「電郵門」困擾，民調差距收窄，博彩公司盤口亦見「褪飛」。
無可否認，總統選舉對美國股市構成的不明朗因素又再回升，對投資者風險胃納必然有一定影響。港股買家心口掛個勇字，在破位之後依然漠視外圍因素，莫非期指大戶真有預知未來的水晶球？
昨日期指早市在22,707點及22,760點確認即市支持後，曾反撲見高位23,054點，稍高於上周五午後阻力23,032點。
不過，中線大市走勢已確認轉弱，好友似乎無心戀戰，反攻也是點到即止，臨收市即市好友的冚倉盤把期指推回22,950點樓下。
昨日筆者建議等收市前，睇住恒指現貨指數收市才決定入唔入市，基於未能重返22,978點的橫行區支持位，先以三分之一「晒士」入市，於昨日臨收市以22,930點開十一月期指淡倉，止蝕位暫訂於23,100點。
John Mullen