外國搞Start-Up（創業公司）係鬥創新，但中國人天性愛鬥大，故內地搞互聯網Start-Up係：搵個有米金主，燒銀紙玩鬥大，喺市場上愈快霸到愈多地頭就贏。
近排兩間內地最紅Start-Up公司，成立得一、兩年，就8億、10億港元咁融資！佢哋搞乜？就係「單車」+「互聯網」+「共享」，再簡單啲講係租單車手機平台。
由幾位廿幾歲北大學生喺一四年成立嘅「ofo共享單車」，主打校園市場要做「校園代步神器」，九月就融資籌得1.3億美元（約10.14億港元）！金主包括滴滴出行同小米雷軍，公司估值達5億美元（約39億港元）。另一家「摩拜單車」就由位80後前記者創辦，今年八月已籌得1.1億美元（約8.58億港元），撐腰金主包括騰訊。
手機租單車係玩咩？好簡單，交付按金後只需用手機App輸入車牌號碼或掃描QR Code就搞掂。咁就估值幾十億元！
余絲韻