絲絲講場：銀行鬥認證指口指面

渣打昨日出指紋認證，係香港首家銀行用手指就登入到手機銀行。聞說有用戶半夜十二點已上網試新嘢。講到隻手指，今次滙豐就輸咗個身位畀渣打，事關滙豐到明年先推指紋認證。

滙豐與香港應用科技研究院合作成立嘅實驗室尋日開幕，啟動儀式有新搞作，搞到好似用臉孔辨識嘅生物認證，代替平時啟動儀式見慣嘅按掣。唔通想同渣打講，仲用手？依家用「面」喇！

輸入密碼計埋力度速度

認指紋只係「生物認證」，滙豐個實驗室開發埋「行為生物認證」，多「行為」兩字，就唔係玩手指咁簡單，而係記得按密碼幾大力、幾快等，就算被人估到密碼，都無可能扮到你股指力！

金融科技實驗室一定唔少得區塊鏈（Blockchain），滙豐實驗室搞緊貿易融資區塊鏈應用、中文字數碼識別系統等幾個Project。滙豐亞太區營運總監鄭小康話，技術仲係初步研發階段，未知幾時推出。

鄭小康話最理想係所有銀行都撐Blockchain，而佢哋有透過應科院同中國銀行（香港）（02388）溝通，涉及跨境嘅貿易融資區塊鏈應用，亦有聯同香港金融管理局一齊同唔同國家研究可以點搞……咁多單位參與，絲絲忽然諗起套《如來神掌》嗰啲滿天飛過招，喂係曹達華嗰套呀！

余絲韻