我要做財演：科網分析員 真身係「潮」童

「分析科技股就一定要跟得貼個潮流。我平日會行吓電器舖或電腦城，了解嗰排興啲咩。」趙晞文稱。他將科網股分為硬件及軟件兩大類，並詳述選擇時需留意的事項。軟件公司包括騰訊控股（00700）、金山軟件（03888）等，業務可細分為管理社交平台、遊戲及電腦軟件等。科技股分析員的必睇位是甚麼？

必睇1 發展路向：了解多元商機潛力

趙晞文以騰訊為例，「最初只提供即時短訊服務，其後仲有手遊、線上線下雙向交易服務。收入來源因而擴大至賺取交易費及遊戲升級、買武器等。軟件科網公司起步收入少，着重儲客，儲夠客先有得諗點發展新業務賺錢。」

手遊睇玩家忠誠度

他稱，必須了解公司過去及將來發展路向，以騰訊手遊業務為例，「要睇睇遊戲有幾多玩家，佢嘅受歡迎程度，同埋估計個遊戲會興幾耐。」趙晞文坦言，不見任何一隻遊戲屬長勝將軍，「好似Candy Crush前兩年好Hit，依家冇人提。」

騰訊過去努力擴大收入來源及提升遊戲質素，令手遊業務增長迅速。他提到騰訊過去跑贏大市主因，「佢不斷收購遊戲生產商，令遊戲數目增加。只要有幾隻遊戲做得好，其手遊業務就會有高速增長。近期佢更以高價收購SuperCell。」

必睇2 財務數據：比較市盈推算增長

除了公司業務，趙晞文續說，要參考其全球可比較競爭對手的市盈率等，從而估算股份估值及未來兩年預測盈利增長。他提醒，「香港上市嘅公司，30倍市盈率係樽頸位，要數都係得幾隻，好似○七、○八年前嘅蒙牛乳業（02319）、百麗國際（01880）、中國旺旺（00151），及依家嘅騰訊同香港交易所（00388）等。」

中小型科技股具折讓

他稱，「呢一兩年投資騰訊，有買貴，冇買錯！估計佢盈利複合增長都有20%以上，咁二十幾倍嘅預測市盈率都算合理。」他看好估值低及盈利增長動力大的股份，「唔少香港上市嘅中小型科技股，市值數十億元，市場對其認知度低、股份流動性低，其估值較多折讓，若細心發掘，會搵到投資機會。」

必睇3 行內對手：全方位評估競爭力

科網行內競爭激烈，分析時尤其要注意。他稱，小米曾參考蘋果公司的飢餓式銷售手法，但已不太奏效，另手機零部件公司也需要不斷提升產品質素，確保客戶繼續大量買入其部件。

某些國產科網股會有優勢，特別是百度、阿里巴巴及騰訊（簡稱BAT），「喺內地係用百度搜尋器，微信支付或支付寶線上線下交易平台，以及WeChat即時短訊，所以BAT可以話係國家戰略產業。」他續說，「騰訊建立咗個生態圈，WeChat唔再單係發送短訊，交水、電、煤等消費都用佢。」

他補充，騰訊屬那些巧合地受惠於國策的股份，所以其業務表現會較好。惟若某公司為配合國策而刻意轉型，例如由原本重資產轉型至輕資產甚至科網，可能會因管理層不熟悉行業，令公司面臨營運危機。

留意利潤及業務潛力

趙晞文提醒，分析業績報告時，緊記看營業利潤率、稅息折舊及攤銷前利潤及淨利潤率。至於研發開支、回購及派息則跟公司業務增長動力有關，「回購及派息愈多，增長動力愈低。」另要留意股東名冊、核數師身份，「睇清楚核數師有無保留意見。」