絲絲講場：韓風襲港 明星股又多一隻
韓風真係吹完又吹，連創業板公司都搵嚟韓星，今次仲要係一線天團Big Bang嘅成員「勝利」（佢仲有個日本藝名叫V.I.）。唔係講緊做公司代言人，亦都唔係請明星入局做董事呀，而係估佢唔到，勝利會做創業板新夜場股陸慶娛樂（08052）嘅基石投資者。
基石投資者（Cornerstone Investor）亦稱「基礎投資者」，有啲公司上市之前，會先引進一啲有知名度嘅人或機構做公司股東，就好似做公司信心嘅保證咁，呢啲股東就叫「基石投資者」。
涉312萬 禁售六個月
陸慶娛樂招股書披露，原名李昇炫嘅勝利，暫時係公司唯一基石投資者，會認購四十萬美元（約三百一十二萬港元）嘅股份，股份禁售期六個月。勝利仲曾經喺佢哋公司澳門嘅Club Cubic表演過，公司仲話未來或會繼續請勝利去嗰個場表演。唔好講咁多，公司十一月十一日掛牌日，勝利同Big Bang會唔會出現先？
余絲韻